Сұранысқа сай кәсіп
Аманкелділік Құралай Бәкірованың торт пісіру кәсібін бастағанына екі-үш жыл болды. Жас келіншек ауыл тұрғындарының тапсырысы негізінде түрлі тәттілер пісіріп, көпті қуантып жүр. Кішкентайларымен үйде отырып сүйікті ісімен айналысып отырған ерлі-зайыпты Төребек пен Құралайдың ауылда «Қыпшақ» атты азық-түлік дүкені де жұмыс істейді.Жақында ауданнан шалғайда жатқан ауылдан жақсы хабар жетті. Жас кәсіпкерлер отбасылық бизнесін кеңейтті. Олар ауыл орталығынан «Құралай» кондитер орталығын ашып, кәсіптерін дамытуға белсене кірісті.
– Ауыл орталығынан өз қолымнан шыққан тәтті торттарды сататын дүкен ашу бұрыннан ойымда жүретін. Үйдің жанынан осыдан 5 жылдай бұрын шағын азық-түлік дүкенін ашқанбыз. Екі қолға бір жұмыс дегендей, жұмыссыз отырмай, отбасымызбен кәсібімізді табыс көзіне айналдыруды, одан әрі кеңейтуді қолға алдық. Тұрғындардың тілегі әрі ауылда дайын тәттілер сататын дүкен болмағандықтан, бұл ойды іске асыруға батыл кірістік. Әрине кішкентайларымның күтімі бар, бірақ қасымда қолдаушыларым әрі қамқоршы қос анам, сіңілілерім Ақтеңге мен Динараның көмегімен бұл іске кірісіп кеттік. Енді ауыл тұрғындары алдын ала тапсырыс бермей-ақ күнделікті дүкеннен тәтті дайын өнімдерді сатып алатын болады, – дейді жас кондитер Құралай Асылбекқызы.
Құралайдың айтуынша, бала кезінен дастархан мәзірін жасауды ұнатып, түрлі тәттілер пісіруге қызығушылық танытқан екен. Уақыт өте тұрмыс құрып, сүйікті ісімен айналысуға бел буған. Алдымен шеберлердің онлайн шеберлік сыныптарына қатысып үйренген. Содан соң қажетті құрал-жабдықтарын сайлап, кәсіби деңгейде шыңдалу үшін Қызылорда қаласында «Тәтті қыз» кондитер орталығын ашқан Айдана Бақыттың шеберлік сыныбына қатысады. Сөйтіп сұранысы артқан әрі сәнге айналған торттың «Вупи-пай», «Қызыл бархат», «Сүтті қыз», «Наполеон» тағы басқа бірнеше түрін пісіруге кәсіби тұрғыда кіріседі. Сондай-ақ ол шеберден басқа да дастархан сәнін келтіретін кондитерлік өнімдердің бірнеше түрін дайындауды үйренеді.
29 жастағы кәсіпкердің негізгі мамандығы – банк ісі. Бірақ мамандығына сәйкес жұмыс істемегендіктен кәсіптің жаңа түрін меңгеруге батыл кіріскен Құралай ізденуден, үйренуден жалықпайды. Ол өздігінен торт пісіру айтарлықтай нәтиже бермейтінін түсініп, онлайн шеберлік сыныптардан өтуді, үнемі тәжірибесін толықтырып отыруды мақсат етеді. Елімізге танымал тәттілердің шеберлері алматылық Индира Бауыржанқызы, Әсел Жұматайдың әлеуметтік желіге жүктеген шеберлік сыныптарына қатысып, торт пісірудің қыр-сырын одан әрі жетілдіруге уақытын арнайы бөледі.
– Менің тұтынушыларым – ауыл адамдары. Сұранысқа сай тапсырыстарды уақытылы орындап, тұрғындардың алғысын алғанымда төбем көкке жетеді. Адамдарға қуаныш сыйлау, ақ батасын алу – үлкен бақыт. Алдағы уақытта мемлекет тарапынан кәсіпкерлерді қолдау бағдарламасы арқылы қайтарымсыз несие алып, табысымызды арттырып, үлкен кондитер орталығын ашқым келеді. Ол үшін әрине, уақыт пен көп еңбек қажет, – дейді «Құралай» кондитер орталығының иесі Құралай Бәкірова.
Мемлекет тарапынан кәсіпкерлікті қолдауға байланысты жұмыссыз азаматтарға арналған түрлі бағдарламалар көп. Оларды кеңінен насихаттау, ауыл адамдарының кәсіп бастауға қолдау көрсету, білмегенін үйрету – ауылдық әкімдіктегі мамандарының міндеті.
– Ауыл орталығынан жаңадан кондитер орталығы ашылды. Ауыл тұрғындарының қуанышында шек жоқ. Тұрғындар алысқа бармай, алдын ала тапсырыс бермей-ақ дайын өнімді осы дүкеннен сатып алатын болады. Өз қаражаты есебінен, кәсіп түрін жандандырған жас кәсіпкердің қадамына сәттілік тілейміз. Жұмыссыз азаматтардың кәсіпкерлікке келуіне, өз бизнесі арқылы табыс табуына мүмкіндік мол. Тек батыл қадам мен нақты шешім қажет, – дейді ауыл әкімі Мейрамбек Нұрғалиев.
Енді Аманкелді ауылының тұрғындары дәмі тіл үйіретін тәтті іздесе, «Құралай» кондитер орталығына баратын болады. Мұнда күн сайын дәмді торттың бірнеше түрі сатылады. Ал Құралайдың тәттілерінен бір рет дәм татқан адам оның тұрақты тұтынушысы болатынына сеніміміз мол. Себебі өз ісінің шебері әрбір өнімді ерекше ынтамен дайындайды.
Біз де өз тарапымыздан отбасылық бизнестің иелері Төребек пен Құралайға кәсіптеріне береке тілейміз
Бибісара ЖАНӘЛІ .
