Алғаусыз алғысқа ие болды
Ақжарма ауылының тұрғындары жергілікті кәсіпкер Олжас Асқаровты жақсы таниды. Елді мекенде азық-түлік дүкені кәсібін дөңгелетіп отырған азаматты ақжармалықтар Атымтай Жомарт ретінде біледі.«Береке» сауда дүкенінің иесі, жас кәсіпкер берекенің көзі игілікті іс жасауда екенін ұғынған. Соған байланысты ауыл халқына әркез жанашырлық танытып, қайырымдылық көмек көрсетуді назардан қалдырған емес. Ол табысының бір бөлігінен әлеуметтік аз қамтылған отбасыларға азық-түліктей көмек көрсетуді үрдіске айналдырған. «Оң қолың бергенді сол қолың білмесін» дегендей, жас кәсіпкер жасаған қайырымды істерін жарияға жар салғысы келмейді. Алайда, ауыл жұртшылығы қайырымды жанға алғаусыз алғысын білдіріп келеді.
О.Асқаров жақында тағы бір жақсылыққа демеушілік көрсетті. Ауыл әкімдігі мен ауылдық мәдениет үйі бірлесіп, «Жүрек жылуы» іс-шарасын ұйымдастырды. Соның барысында мүмкіндігі шектеулі бүлдіршіндерге арнайы барып, азық-түлік пен ойыншықтарды табыс етті. Ауылдық мәдениет үйінің директоры Айтмағанбет Темірханов ізгілікті іс-шараның мән-маңызын атап өтті.
– Қайырылымдық жасау – жақсы қасиет. Осыған орай, ауыл әкімдігімен бірлесіп, игілікті іс-шара өткізуді ұйғардық. Сол арқылы мүмкіндігі шектеулі балдырғандарды қуанту мақсатымыз болды. Осы іс-шарамызға ауыл кәсіпкері қолдау білдіріп, бүлдіршіндердің қуануына ерекше үлес қосты. Сондықтан жас кәсіпкерге айтар алығысымыз шексіз, – дейді А.Темірханов
Ауылдың Атымтай Жомартына бүлдіршіндердің отбасы да зор ризашылығын білдірген.Ердос БЕРКІНБАЕВ
