Халыққа керегі – бірлік

Небір тауқыметті басынан өткерген қазақ халқы жаңа жылдың басында тағы да қиындықты басынан өткеруде. Бірнеше күннен бері бейбіт шеруден басталған жиынның ақыры қылмыстық әрекетке жалғасты. Халықты үрей билеп, қарашаның көңілі күпті болды. Шын мәнінде, ел-халыққа қазір тыныштық пен бейбіт өмір қажет. Отыз жыл бойы Тәуелсіздікті ту еткен дана халқымыз мұндай сұмдықты көріп, шын мәнінде абыржып қалды. Осындай кезде сырдариялықтар сабырлық танытып, заң бұзбай, ортақ тәртіпке бағына білді. Сондықтан бекем бірлікті ту еткен аудан халқына, түсіністік танытқан жерлестерімізге аналық алғысымды айтамын. Расында да бәрі байыппен, сенімді диалогпен реттелетіні анық.

Сағат сайын теледидардан беріліп жатқан нақты ақпараттар елге бүлік салушылардың әрекеттерін көрсетуде. Бүлінген жер мен өртке оранған ғимараттар, автокөліктер саны артып, ауруханалар жарақат алғандарға толды. Әрине, жағдай өте қиын. Мемлекет басшысы Қасым-Жомарт Кемелұлы Тоқаев өз Үндеуінде кінәлілер мен террористік әрекетке барғандар жазаланатынын айтты. Адам өмірі – бәрінен қымбат. Сондықтан адам өміріне қауіп төндіргендер мен мемлекеттің мүлкіне зиян келтіргендер міндетті түрде заң алдында жауап беретін болады.

Қазір тұрғындарға шыдамдылық пен ауызбірлік ауадай қажет. Өйткені барлық қиындықты татулық, тұрақтылық еңсереді. Ел ақсақалдары мен зиялы қауым өкілдері елге басу айтқаны жөн. Арандатушылардың жетегінде кетпей, елді бірлікке шақыру маңызды. Әсіресе әйелдер қауымы, аналар үйде жас балаларына ие болып отыруы керек. Сонда ғана бәрі қалыпқа түспек.

Ұлмекен ЖАНӘЛИЕВА,
«Сырдария ауданының
әйелдері» қоғамдық
бірлестігінің төрайымы