Кездесуде ұлтымыз үшін ұлық мереке жайында ел аналары өз ойларымен бөлісті. Азаттықтың арайлы таңы атқан сәттен егемендік қадірін ұғыну басты парыз екенін айтты. Өз кезегінде еңбек ар­дагерлері Камал Бисариева мен Гүлбаршын Қоразоваға құрмет көрсетілді. Қос анаға Алмагүл Божанова «EL Qurmeti» қоғамдық қорының «Еңбек Даңқы» медалі мен «Алғыс хатын» табыстады. Сонымен бірге, қазақы дәстүрмен қамзол жапты.

Негізінен, ақ жаулықты аналар қарапайым ауыл тіршілігімен тыныстап, саналы ғұмырында ең­­­­селі еңбек етті. Мәселен, Камал Бисариева ақи­ық ақын Асқар Тоқмағамбетов ауылында бала­бақшада қызмет етті. Қиын-қыстау кезінде бала­бақша мең­герушілігі қызметін атқара жүріп, тәрбие ошағының жұмысын тоқ­тат­паған. Осылайша, қажырлы қайратының арқасында «Қазақ ССР білім беру ісінің үздігі» медалімен марапатталған. Ал Гүлбаршын Қора­зова Шіркейлі ауылында бақша өнім­дерін өсірумен айналысқан. Екі мәрте ауылдық советтің депутаты болған. Ауыл шаруашылығы саласына қос­қан үлесі үшін бірнеше жоғарғы мара­паттарға қол жеткізген. Осыдан 21 жыл бұрын «Ақ Дариға» халықтық әже­лер ансамблінің мүшесі ретінде қабыл­данған.

– Ел Тәуелсіздігінің 30 жылдығы аясында аяулы жандарға құрмет көрсетудеміз. Әзиз жандардың ел үшін еткен еңбектері орасан. Әркез әйел заты бақыт құшағында жүреді. Отбасы ұйытқысына ай­нал­ған олардың жастық шағын нағыз бейнетті кезеңмен байланыстырамыз. Егемендікке қол жет­кізіп, еңсемізді тіктей бастаған шақта анала­­­рымыз ер азаматына сүйеу болды. Тұғырлы Тәуел­сіздігіміздің жарқын жетістіктеріне куә болды. Қос ананың елеулі қызметтерін бағалап, «Ең­бек Даңқы» медалінің берілуіне шын жүректен қуаныштымыз, – деді «Қызылорда облысының» және «Сырдария ауданының Құрметті азаматы» Алмагүл Божанова.

Ізгілікті іс-шарада еңбек ардагер­лері Зылиха Сыздықова мен Мағрипа Жүсіпова жылы лебіздерін білдірді.