Айтулы күннің куәсі болып отырмыз
Аудан тарихында 80 жылдан астам уақыттан бері өзіндік орны бар «Тіршілік тынысы» газеті редакциясы мен үшін ыстық. Ақын болып қалыптасуыма, шығармашылығымды шыңдауға қамқор болған редакцияда бүкіл ғұмырым өтті десем артық айтқандық болмас.Жалындаған жастық шағымда еңбек жолымды редакциядан бастап, қаншама жаны жайсаң қаламгерлермен бірге қызмет атқарып, бүгінде құрметті зейнет демалысындамын.
Арада қанша жыл өтсе де редакцияның тыныс-тіршілігінен қол үзген емеспін. Бастауыш ардагерлер ұйымының төрағасы ретінде қоғамдық жұмысқа араластым. Жыл сайын неше мәрте басымызды қосатын редакция ұжымы арнайы ардагерлерге бөлме берді. Сонда ұжыммен кездесіп, өзара пікір алысып, редакцияның алдағы атқаратын міндеттерден хабардар боламыз. Газеттің қазіргі сапасында, мазмұнында да жаңашылдық бар. Таралымның да артуы, оқырмандардың ойынан шығатын мақалалардың жарыққа шығуымен байланысты деген ойдамын.
Ақпарат айдынында өзіндік орны бар аудан айнасының бүгін қолымызға 9000-шы нөмірі тиді. Осындай тарихи кезеңді, айтулы күнді оқырмандармен бірге қарсы алып отырғаныма қуаныштымын. Алдағы уақытта газеттің жұмысына сәттілік тілеп, ойлы оқырмандардың ықыласына бөленіп, алғыс ала берулеріне тілектеспін.
Мұхтар САҚТАПОВ,
Қазақстанның Құрметті Журналисі,
«Сырдария ауданының Құрметті азаматы»
