Мейірімнен жаралған ұстаз-ана

Әлемдегі ең құрметті де, қасиетті мамандық иесі ол – мұғалім. Мұғалім – адам тәрбиелейді. Оның алдынан барлық маман иесі шығады. Адам болып қалыптасудың алғашқы әліппесін мұғалімнен алады. «Адамның адамшылығы ұстазынан» демекші, үлкен өмірге қадам басатын әрбір азаматқа шамшырақ болатын ұстаздың құдіретті есімін шәкірт жүрегінде мәңгі сақтайды.

Осындай құрмет иесі, бүгінде сексеннің сеңгіріне шыққан ардақ­ты ұстаз Доскүл Абдуллинаның оқыт­қан шәкірттерінің арасында ғалым да, инженер де, ақ халатты абзал жан да, өзі секілді ұстаз да, қарапайым жұмысшы да шықты. Олардың барлығы ұстаз есімін ардақтап, білім нәрімен сусындатқан ұстазға бас иеді.

Болашағын ұстаздықпен байла­ныс­тырған Доскүл апайдың ата-анасы қарапайым жандар болған. Әкесі Ыдырыс – қара жұмыста ысыл­ған, елге сыйлы болған азамат. Анасы Назым үй шаруасымен, бала тәрбиесімен айналысқан. Ұлттық салт-дәстүрді ұстанған, пер­­зенттерінің бойына жақсы қа­сиет­терді сіңірген ел-анасы атанған. Доскүл апайдың нағашысы ақ­иық ақын Асқар Тоқмағамбетов жиенінің бойынан оқу-білімге деген құштарлығын байқап, ұстаз болғанын қалап, батасын берген. Арманы асқақ болашақ ұстаз аудан орталығындағы №35 орта мектепті үздік бітіріп, Қызылорда қаласындағы педагогикалық инс­ти­туттың жаратылыстану факуль­тетіне оқуға түседі. Институтты химия-биология пәнінің мұғалімі мамандығы бойынша аяқтаған Доскүл Абдуллина өзі білім алған мектепте еңбек жолын бастайды.

– Жүрек қалауыммен мұғалім болдым. Оқушыларға сапалы білім беруде ізденіспен жұмыс жасадық. Әріптестеріммен тәжірибе алмасып, оқушыларды пән олимпиадаларына дайындауда алдымызға жан салмайтынбыз. Пәнге деген қы­­зығушылықты арттыру үшін зерт­­ханалық сабақтарды көптеп жүр­­гізетінбіз. Жабдықталған пән ка­­би­неттерінде сабақ беріп, оқу-шылардың қызығушылығын артты­рып, уақытпен санаспайтынбыз. Қа­зір еңбегімнің жемісін көріп отырмын. Шәкірттерім қандай қызметте жүрсе де ұмытпай, мерекелерде құт­тықтап жатады. Ардагер-ұстаз ретін­де сый-сияпатқа кенеліп отыр­мын. Өзім еңбек еткен №35 мектеп-лицей басшылығы ұжымның атынан мерейтойыммен құттықтап келді. Ризамын, Алланың нұры жаусын. Қарт ұстаз үшін мұнан асқан бақыт жоқ шығар, сірә, – дейді ардагер.

Иә, «Ұстаз болу – өз уақытыңды аямау, өзгенің уақытын аялау» деп айтпақшы, ұстаздың еңбегі ерен. Шәкірт жүрегіне жол тауып, сапалы білім беріп, ел болашағының негізін қалайтын өрендерін тәр­биелеп шығару – нағыз ұстаздың қолынан келетін өнер. Бір сөз­бен айтқанда, Доскүл апай жүрек жы­­луын, мейірім шуағын, адам­гершілік ұлылығын оқушының бойы­на дарыта білген ұстаз деген атқа лайық болды.

Ардақты жан мемлекет және қоғам қайраткері Қырымбек Көшер­баев, Моңғолияда елшілік қызметті атқар­ған Қалдыбек Қобландин, №35 мек­теп-лицей директоры Бақытжан Бақ­бергенова, ардагер-журналист Шаһар­бек Нұрсейітов және тағы басқа еліміздің түкпір-түкпірінде қыз­метте жүрген белгілі азаматтардың ұстазы болған. Ұс­таз шәкірттерінің жетістіктерін көріп, біліп, тілеуқоры болып отырады. Шәкірттерінің есімдерін мақ­танышпен айтады.

Доскүл апай саналы ғұмырында оқушыларға білім берумен қатар сүйікті жар, аяулы ана болды. Төребек Сапаров есімді азаматпен бас қосып, ұл-қыз тәрбиеледі. Қазір 4 ұл мен 1 қыздың барлығы жоғары, орта кәсіптік білімдері бар, түрлі салада қызмет жасайтын бір-бір отбасы иесі.

– 40 жыл ұстаз болдым. Өмі­рімді шәкірт тәрбиесі мен біліміне арнадым. Отбасын құ­рып, шаңыра­ғымызда береке-бір­лік орнады. «Адам ұрпағымен мың жасайды» де­мекші, осынша жасқа келгеніме Аллаға шүкір­шілік айтамын, өсіп өніп жатырмыз. Үлкен ұлым – Бақытбек Қы­зылорда қала­сында мұнай саласында, екін­­ші ұлым Дәуітбек – Алматы қала­сында көлік қатынасы саласында маман. Қызым – Гүлнара жолымды қуып, ұстаз атанды. Ол Назарбаев Зияткерлік мектебінде химия-биология пәнінен сабақ бере­ді. Үшінші ұлым Батырбек – мұнай саласында бұрғылаушы. Кенжем Ақыл­бек – жеке кәсіпкер. Барлығы да отбасылы, ұл-қыз тәрбиелеп отыр. Балаларымнан 14 немере, 4 шөбере сүйіп отырған бақытты әже­мін. Немерелерім Алтынбек, Мөлдір, Жәмиля қаржы­герлер, Асылбек көлік қыз­метін­де, Нұрсұлтан Қорғаныс күш­­тері саласында ұшқыш. Басқа да немерелерім әртүрлі маман­дықтарды таңдап, елге қызмет етуде, – дейді ақ жаулықты ана.

Мамандығын шын сүйіп, ұлы қыз­метте абыройға кенелген ар­дақты ұстаз адамдықтың бақытына осылайша жетіп отыр.

Бибісара ЖАНӘЛІ