Той тарқатылды
Газетіміздің өткен санында карантин талаптарын сақтамаған сырдариялық жеке және заңды тұлғалардан барлығы 2 млн 348 мың теңге айыппұл өндірілгенін жазған болатынбыз. Мониторингтік топ мүшелерінің рейдтік тексерісі барысында бұл көрсеткіш тағы да артты. Нақтырақ айтқанда, карантин талаптарына бағынбай, қыз ұзату рәсімін ұйымдастырушылар анықталды.Мониторингтік топ мүшелері Тереңөзек кентінің М.Мәметова көшесіндегі думанды тойдың «үстінен түсті». Қыз ұзату рәсімін ұйымдастырушылар карантин талабы бойынша жиын-той өткізуге рұқсат етілмегенін естісе де рейдтік тексерістің келетінін күтпепті. Той иелері ақталып, қарсыласуға тырысқанымен мониторинг топ мүшелері қаулы талаптарын түсіндіріп, заң аясында шешім қабылдады.
– Санитарлық нормаларды сақтау – коронавируспен күресте маңызды шарт. Тұрғындарға карантин талаптары жергілікті газет пен әлеуметтік желідегі ресми парақшалар арқылы түсіндіріліп, насихатталуда. Алайда, ортақ талапқа бағынғысы келмейтіндер көп. Мониторингтік топ мүшелері заң аясында шешім қабылдап, тағы бір той тарқатылды. Той иелерінің түсініктері алынып, әкімшілік хаттама толтырылды. Айыппұл төлеген абырой емес. Өзіміздің және жақындарымыздың амандығы үшін оқшауланып, адам көп шоғырланатын аумақтарға бармауымыз қажет, – дейді №2 мониторингтік топ жетекшісі А.Мырзахметова.
«ТТ» ақпарат
