Шаруашылық тарапынан құрмет көрсетті
Ел Тәуелсіздігінің 30 жылдық мерейлі мерекесі Асқар Тоқмағамбетов ауылында жоғары дейгейде аталып өтілуде. Мерейтойлық іс-шараларға бірлігі бекем, тірлігі көркем «А.Тоқмағамбетов Жер» ЖШС өз демеушілігін көрсетіп келеді. Асқар Тоқмағанбетов ауылдық клубында ҚР Суретшілер одағының мүшесі, ҚР Мәдениет саласының үздігі, Сырдария ауданының Құрметті азаматы, қолөнер шебері Жәнібек Маханбеттің «Ұрпағым өнерлі болсын десең – өнегеңді көрсет» атты көрмесі өтті.
Санитарлық талаптар сақтала отырып өткізілген іс-шараға мекеме басшылары, музей қызметкерлері, қолөнер шеберлері және ауыл жастары қатысты. Іс-шарада Ж.Маханбет өзінің шығармашылығы жөнінде ақпараттармен бөлісіп, туындыларының жасалу жолдарын түсіндірді. Қатысушылар тарапынан қойылған сұрақтарға жауап берді.
Іс-шара барысында «А.Тоқмағамбетов Жер» ЖШС директоры Б.Жақып қолөнер шеберіне қазақы дәстүрге сай шапан жауып, қаржылай сый-сияпат жасады.
– Жәнібек Асанұлы – ауданымызға ғана емес облысымызға белгілі талантты тұлға. Егемендік мерекесі қарсаңында ауылымыздың, ауданымыздың абыройын асқақтатып, өнер әлемінде биік белестерді бағындырған талантты азаматқа құрмет көрсету, көрмесін ұйымдастыру – өте орынды іс. Іс-шараға қатысушыларды Тәуелсіздіктің 30 жылдық мерекесімен құттықтаймын. Ауылымыз өркендеп, дами берсін!, – деді шаруашылық директоры құттықтау сөзінде.
Өз кезегінде ҚР Суретшілер одағының мүшесі, ҚР Мәдениет саласының үздігі, Сырдария ауданының Құрметті азаматы, қолөнер шебері Жәнібек Маханбет арнайы іс-шара ұйымдастырған ауылдық клуб ұжымына, іс-шараға қатысушыларға ризашылығын білдірді. Сондай-ақ шаруашылықтың жұмысына жеміс пен сәттілік тіледі.
