Тіршілік тынысы Сырдария аудандық қоғамдық-саяси газет
» » Білімге құштар жас ғалым

Білімге құштар жас ғалым

Азат елдің озат оқушылары өз арамызда да бар. Мәселен, Тереңөзек кентіндегі №131 Т.Қозыбаев атындағы орта мектебінің бастауыш сынып оқу­шысы Бақдәулет Керейтбаев – білімге құштар, ынталы оқушылардың бірі де бірегейі. Ұстаздар сенімін, ата-ана үмітін ақтап келе жатқан оның екінші аты – Ғалымбек.

Бақдәулеттің анасы, ұстаз Маржан Бекішованың айтуынша, жас өреннің есімін атасы Керейтбай «немерем бақ пен дәулетті білімнен тапқан азамат болсын» деген ниетте қойыпты. «Адамның есімі – жарты ғұмыры» деген тәмсілге сүйенер болсақ, дүниеге келген перзенттің білім мен ғылымға жақындығы әу бастан белгілі болған. Мына бір қызық оқиға соның дәлелі іспетті.

Бүгінде екінші сыныптың озат оқушысы Бақдәулет дүниеге келген жылы анасы магистр ғылыми дәрежесін алу мақсатында диссертация қорғайды. Жас ана қырқынан шықпаған перзентін жөр­гекке орап, университет қа­бырғасына бірге алып барады. Қызығы сол, сәби мемлекеттік аттестация комиссияның мүшесі, филология ғылымдарының кандидаты Махамбетжан Қойшыбаевтың назарына түседі. Сәтті қорғалған диссертация­дан соң ата-ана­сы­ның келісімімен филология ғылым­дарының кандидаты сәбидің аузына түкіріп, «анасымен бірге диссертация қорғауға келген бала өскенде ғалым болсын» деп бата береді. «Қырықтың бірі – Қыдыр, мыңның бірі – уәли» демекші, сол күнгі ақ тілек пен ақ бата баланың бойын білім нұрымен қуат­тандырады. Бақ­дәулет тілі шыққан ке­зінен және мектеп табал­дырығын аттаған сәттен бастап ақылды, ойы ұшқыр, елгезек болып өсіп келеді.

– Сыныптағы әр оқу­шыға жеке тұлға ретінде қа­рай­мын. Олардың әрбірінің талабы мен таланты бар. Сыныптың бел­сендісі Бақдәулет – алғыр оқушы. Ол сыныпта және сыныптан тыс уақытта ізденімпаз оқушы ретінде танылып келеді. Жас өрен жақында халықаралық ғылым мен білімді қолдау ор­талығының ұйымдастыруымен өт­кен республикалық «Жас ғалым – 2021» ғылыми жоба байқауының жеңімпазы атанды. Алматы қа­ласынан І дәрежелі диплом және медаль келгенде және ғылыми жобасы республикалық жинаққа енгенде қуанышымызда шек болмады. Бұл мектептегі білім мен үйдегі тәрбиенің жемісі, – дейді Бақдәулеттің сынып жетекшісі, №131 Т.Қозыбаев атындағы ор­та мектебінің бастауыш сынып мұ­ғалімі Махаббат Сайымова.

Иә, үйдегі тәлім-тәрбие мектеп­тегі сапалы біліммен ұштасса, оқу­­шылардың болашағы жарқын бол­мақ. Бақдәулеттің әкесі Ринат Керейтбайұлы – Қорқыт Ата атын­дағы ҚМУ түлегі. Облыстық №2 арнаулы әлеуметтік орталығында аға бақылаушы қызметін атқаратын ол бала тәрбиесіне жіті көңіл бөледі. Ал анасы Маржан Бекішова жоғарыда атап өткеніміздей, педагогика ғылымдарының ма­гистрі, №131 Т.Қозыбаев атын­дағы орта мектептің баста­уыш сынып мұғалімі. Білімді ұстаз жа­қында Нұр-Сұлтан қаласында ұйымдастырылған республикалық байқауға қатысып, ғылыми жобасы үздік деп танылды. Енді ол арнайы шақыртумен марапаттау салтанатына қатысу үшін бас қалаға жол тартпақшы. Балаға барлық жақсы қасиет ана сүтімен берілетінін ескерсек, болашақ жас ғалым Бақдәулет анасы секілді білімнің шыңын бағындырып, биік белес­терден көрінеді деп сенеміз.

А.СЕЙІЛОВ 
03 сәуір 2021 ж. 327 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам