Саяси жүйе заманға сай дамуда

«Биыл қастерлі Тәуелсіздігімізге 30 жыл толады. Бұл – қайта жаңғырған қазақ мемлекеттігінің, ата-бабаларымыз аң­саған азаттықтың тұғыры нығая түскенін әйгі­лейтін маңызды белес». Мемлекет бас­­шысы Қасым-Жомарт Тоқаевтың «Тә­уелсіздік бә­рі­нен қымбат» мақаласы биылғы жылдың ерекше маңызды екенін меңзеумен басталды. Өйткені 30 жылда қазақ елі егемендігіне қол жеткізіп, дамудың даңғыл жолына түсті. Экономикалық әлеуеті артып, аз ғана уақыт ішінде әлем елдерімен терезесі тең мемлекетке айналды. Бұл Тәуелсіздік жыл­да­рындағы зор жетістік.

Президент мақаласының «Ұлағат пен ұстаным» бөлімінде Қазақстанның саяси жүйесі заманға сай дамып келе жатқанына тоқталды. Яғни, елімізде жүзеге асырылып жатқан барлық бастамалар азаматтық қоғам­ды дамытуға негіз болады. Бұл ретте, Мемлекет басшысының «Халық үніне құлақ асатын мемлекет» тұжырымдамасы биліктің халық алдындағы жауапкершілігін көздейді. Осыған орай алдағы уақытта ең төменгі деңгейден бастап жергілікті өзін-өзі басқару жүйесін нығайту жұмыстары жүргізілмек. Бұл тұрғындар мен биліктің кез келген мәселені бірлесе шешуіне ықпал етеді.

Сондай-ақ Президент Мәжіліс және мәс­лихаттар депутаттарын сайлаудың маңы­зы жоғары екенін атады. Бұған қатысты ме­млекетте әралуын саяси партия­лар бол­ғанымен оларды біріктіріп тұрған құндылық – Тәуелсіздік екенін ерекше атап көрсетті. Яғни, тұрақтылықты ту етіп, бір шаңырақ астына топтасқан халық  ел егемендігін сақ­тау жолында ынтымақ танытатыны анық. Сондықтан Тәуелсіздік – бүгінгі ұрпақтың басына қонған бағы. Оны қастерлеу – баршамызға міндет. Түптеп келгенде, елі­міздегі тұрақтылық пен береке-бірлік үшін барлығымыз бірдей жауаптымыз. 

Сталбек ТОБАҒҰЛОВ,

аудандық мәслихат аппаратының

бөлім басшысы