№137 мектептің тарихы сонау 1930 жылдан бастау алады. Алғаш «1 Май» мектебі Қараөзек бойында Қаратөбе деген жерде Жөлекен мешітінде бастауыш мектеп болып ашылған. Кейін 1932 жылы Байсары жерінде жаңадан «Ақ школ» деген мектеп үйі салынған («Ақ школ» деп аталу себебі сол кездегі мектеп үйінің алғаш рет әктелгендігінен деген сөздер ел арасында бар). Сол жылы оқушылар білім алуды бастағанымен елде жаппай ашаршылық орын алып білім ошағы жабылған. Содан бері небір тоқырау заманды басынан өткерген білім ордасының қазіргі ғимараты 1974 жылы салынып, пайдалануға берілген. 460 орындық мектепте қазіргі уақытта 430-ға жуық оқушы білім алуда.

2013 жылдан бері №137 орта мек­тебін осы мектептің түлегі Бағдат Есназар басқарып келеді. 2015 жылы жер­гілікті бюджет есебінен мектеп жанынан жаңадан акт залы салынып берілуі мате­риалдық базаның нығаюымен қатар оқу-тәрбие үдерісі сапасының артуына мол үлесін қосты. Қазіргі күні мектепалды даярлық топтарында 45 бала тәр­биеленуде. Оларға 53 мұғалім білім бе­руде. Олардың 6-ы жоғарғы санатты, 21-і бірінші санатты, 16-ы екінші санатты ұстаздар. Ұлттық біліктілік санаты бойынша ұстаздардың 13-і педагог-зерттеуші, 15-і педагог-сарапшы, 10-ы педагог-мо­де­ратор ұлттық біліктілік деңгейінен өт­кен. Жаңартылған білім мазмұны бойынша біліктілік арттыру курстарынан педагог қызметкерлердің барлығы өткен.

Мектепте 12 пән кабинеті жұмыс жасайды. Оның ішінде мультимедиялық ка­­бинет, интерактивті тақтамен қамтылған физика, хи­мия сыныптары заман талабына сай жабдықталған. Сонымен қатар оқу­шыларға арналған спорт залы, спорт алаңы спорттық қондырғыларымен және жасанды төсенішпен жабдықталған, акт залы және кітапхана жұмыс жасайды.

– Елдегі пандемияға байланыс­ты оқу про­цесінде көптеген өзгерістер орын алды. Мектеп әкімшілігі қашықтан оқы­ту процесін, оның ішінде техникалық жағдайды ұйымдастыруды қамтамасыз етіп, жұмыс сапасын арттыруға бағыт­талған басқарушылық шешімдерді дер кезінде қабылдадық. Қажеттілігіне қарай педагогтар мен білім алушылар және олардың ата-аналарымен кері байланыс­ты жүзеге асырып, интернет желісі мен байланыс құралдарына мүмкіндігі жоқ білім алушыларға көмек көрсету жұмыс­тары ұйымдастырылды. Індет кезеңінде аз қамтылған отбасы балаларына қол­дау көрсету, оларды қашықтан оқыту кезеңінде туындаған қиындықтарды ше­шу мақсатында ауылдағы шаруа қожа­лықтары өздерінің көмектерін аяп қал­мады. Жас ұрпақты біліммен қамту мақ­сатында «C.Сейфуллин Жер» ЖШС-нің төрағасы О.Саймағамбетов 6 балаға, «Жан­дос» шаруа қожалығының төрағасы С.Арық 3 балаға, «Абай-Дәулет» ЖШС 10 балаға, аудандық білім бөлімі тара­пынан мүмкіндігі шектеулі 8 балаға демеушілік жасалып, планшеттер сыйға тартылды. Мұның барлығы қиын күндерде оқу­шыларға жасалған үлкен жақсылық деп білемін, – дейді мектеп директоры.