Тәуелсіздік – ұлылықтың ұлысы
Ел егемендігінің 29 жылдығына орай Н.Ілиясов ауылындағы №132 Т.Айтбаев атындағы орта мектепте тағылымды іс-шаралар ұйымдастырылды. «Ауыл мектебі» жобасы аясында «Тәуелсіздік – ұлылықтың ұлысы, қазағымның берік болсын уығы» атты апталық өтіп, онда оқушылар арайлы азаттықтың – ғажап құт екенін ұлықтады.Апталықты мектептегі қазақ тілі мен әдебиеті пәні бірлестігі ұйымдастырды. Оның негізгі мақсаты – оқушыларға қазақ халқының Тәуелсіздік жолындағы еркін күресі мен Қазақстанның 29 жыл ішіндегі қол жеткізген жетістіктерімен таныстыру, олардың қазақ тілі мен әдебиеті пәніне деген қызығушылықтарын арттыру және шығармашылық қабілеттерін дамыту.
Тәжірибе алмасу бағытындағы апталықта пән мұғалімдері Р.Мұхан, Қ.Досай, Г.Қалбаева 7-9 сынып оқушыларымен қазақ тілі мен әдебиет пәндерінен ашық сабақ өткізді. Оған облыстық оқу орталығының әдіскері Ж.Сыздықова, аудандық білім бөлімінің әдіскері Қ.Қалжанова, Ж.Төреқұлова, облыстағы №143, №164 орта мектептерінен қазақ тілі пән мұғалімдері мен аудан мектептерінің ұстаздары, мектеп директоры І.Анафияев, оқу ісі жөніндегі орынбасары А.Әбілдақызы қатысты. Өткізілген сабақ жөнінде арнайы қатысқан ұстаздар өз пікірлерін білдірді. Аудандық білім бөлімінің әдіскері Қ.Қалжанова кері байланыс жасап «Сабақ жоғары дәрежеде өтті, оқушылар сабаққа белсенді қатысып, жұмыс жасалды. Көрнекі құралдар, бейнематериалдар дайындалып, тақырып ашылды. Оқушылардың барлығы белсенділік танытты. Бүгінгі жас ұрпақ – ертеңгі мемлекет тұтқасын ұстаушы білікті маман, ел тағдырын шешуші азамат. Оларға осы кезден егемендіктің, бейбіт өмірдің қадірін түсіндіре білуіміз керек. Жас ұрпақты тәрбиелеуде жұмыстарыңызға сәттілік тілейміз» деп атап өтті.
Апталық барысында пән мұғалімдері С.Кенебаева мен Ж.Байсынова 5-6 сынып оқушыларымен сыныптан тыс іс-шара өткізсе, ЗУМ бағдарламасы арқылы 5-11 сынып оқушыларының арасында «Тәуелсіздік деп соғады жүрегіміз...» тақырыбында мәнерлеп оқу сайысы ұйымдастырылды. Сайыс барысында оқушылар егемендікке арналған өлеңдерді мәнерлеп оқыды. Нәтижесінде 5-сынып оқушысы А.Советбек І орынды, 8-сынып оқушысы Ұ.Жидебай ІІ орынды, 5-сынып оқушысы Қ.Мақсатқызы ІІІ орынды иеленді. Ұлық мерекеге арналған апталықта мұғалімдер оқушыларға тәуелсіздік қазақтың басына қонған бағы екенін жан-жақты түсіндірді.
«Біздің мақсатымыз ұлық мерекені ұлықтап, оқушылардың қазақ тіліне деген қызығушылығын күшейту еді. Апталықта сол мақсатқа жете білдік деп ойлаймыз» дейді бірлестік жетекшісі Р.Мұхан.
