Әуесқой суретші
Шын талантқа тұсау жоқ. Бұл ежелден дәлелдеуді қажет етпейтін аксиома. Біз өткен айдың ортасында әуесқой суретші Ұлбосын Мұхамбетқалиқызы туралы газет бетіне жазып, оның туындыларын жариялаған болатынбыз. Мұндағы мақсатымыз – ел ішіндегі шын талант иелерін көпшілікке таныту. Сол мақаладан кейін тағы бір сурет салуға әуес мектеп оқушысы хабарласып, редакцияға келді. Оның ақ қағазға қылқаламмен салған туындыларын көріп, талантына тәнті болдық.Біз айтып отырған суретші қыз – Меруерт Маханова. Ол Тереңөзектегі №210 Оспан Әбілпаттаев атындағы орта мектебінің 11-сынып оқушысы. Әуесқой суретшінің сурет салуға деген ынтасы 5-сынып оқып жүргенде артқан. Оқушының бейнелеу өнеріне мектеп ұстаздары Қарлығаш Білісбаева мен Олжас Құлабаев баулыған. Ұлағатты ұстаздардан сурет салудың қыр-сырын меңгеріп, жыл өткен сайын оның таланты шыңдала түседі. 9-сыныпқа келгенде жас суретші адамның портреттерін айнытпай салатын дәрежеге жетеді. Қылқалам құдіретімен адам бейнесін ақ қағаз бетіне түсіріп, ерекше өнерімен көпшіліктің таңданысын тудырған. Осындай талантымен мектеп оқушысы аудан және облыстағы суретшілер байқауына қатысып, бірнеше рет жүлделі орындарды жеңіп алған.
Әуесқой суретші Меруерт жеке адамдардың портретін салуға машықтанған. Суретші қыз биылғы мерейлі белестер жылына орай шығыстың ғұлама ойшылы Әбу Насыр әл-Фарабидің, қазақтың дана ақыны Абай Құнанбайұлының, Қазақстанның Тұңғыш Президенті-Елбасы Нұрсұлтан Назарбаевтың, Мемлекет басшысы Қасым-Жомарт Тоқаевтың портреттерін қылқаламмен салып шыққан. Сондай-ақ «Желсіз түнде жарық-ай» тақырыбында гуашты пайдаланып, ерекше көзтартарлық туынды салған. Бұл суреттер жас таланттың осы бейнелеу өнері саласында болашағы зор екенін аңғартады.
М.Маханова сурет салумен қатар басқа да жақсы қырынан танылып келеді. Ол осыған дейін спорттың волейбол түрімен айналысқан. Жетістіктері де бар. Онымен қоса өзі ән салғанды ұнатады. Қазіргі таңда акробатикамен айналысуда. Одан бөлек, өзі көптілді білуді мақсат еткен. Қазір ол қазақ, орыс және түрік тілінде еркін сөйлейді, ағылшын тілінде жақсы меңгерген. Озат оқушы түрік тілін жазғы демалыс уақытында «Lingust.ru» сайтынан арнайы үйреніп алған. Негізі, бойжеткен «Әркім жас кезінде түрлі білім мен өнер үйреніп, жетістікке жетуі керек» деген ұстанымды ұстанған. Осы жолда ізденіп келе жатқан биылғы мектеп бітіруші талапкер болашақта ұстаз немесе архитектор болуды мақсат тұтқан.
– Отбасында болашағымыз туралы жиі әңгімелесеміз. Әкем мені Темірбек Жүргенов атындағы өнер академиясында оқып, шығармашылықпен айналысқанымды қалайды. Ал, менің ұлағатты ұстаз немесе архитектор болғым келеді. Өйткені, бала бағбаны болып, оқушыларға білім берген ұнайды. Сонымен қатар, архитектор мамандығы мен үшін өте қызық. Сондықтан ҰБТ-дан жақсы нәтиже көрсетіп, осы мақсат жолында білім аламын. Оның үстіне қазіргі таңда архитектор маманға сұраныс жоғары. Сурет салу – менің ерекшелігім. Бұл жұмысты қосымша да алып жүруге болады. Тек ізденістен қол үзіп кетпеу керек, – дейді жас талант.
Үш қыздың кенжесінің алдағы үлкен өмір асуларында бейнелеу өнеріне деген ынтасы арта түсіп, көптеген жетістіктерге жететіні анық. Мұндай талантымен оның биік белестерді бағындырарына біз сенімдіміз. Сондықтан талантты бойжеткенге шығармашылық сәттіліктер тілейміз.
Атап өту керек, әуесқой суретші бүгінде адам бейнелерін ақ қағаз бетіне айнытпай түсіріп, оны сатып, қосымша табыс тауып келеді. Бұл оның өз қажеттіліктерін өтеуіне жол ашуда.
Ердос СӘРСЕНБЕКҰЛЫ
