Тіршілік тынысы Сырдария аудандық қоғамдық-саяси газет
» » Суретші қыздың сырлы әлемі

Суретші қыздың сырлы әлемі

Ұлбосын Мұқамбетқалиқызы – әуесқой суретші. Бірақ оның салған суреттері кәсіби суретшілердің туындыларынан кем емес. Оның суреттерінен жүрек лүпілі, көңіл толқынысы, сезім сыңғыры сезіліп тұрады. Сондай-ақ ол өз суреттерін аса ыждағаттылықпен, іңкәрлікпен, махаббатпен салғанды қалайды.

Әуесқой суретшінің туындыларын алғаш рет әлеуметтік желіден көрдім. Кейін сәті түскенде суретшілік қарым-қабілеті туралы Ұлбосынның өзінен сұрағанымда ол жәй ғана қызығушылық деп түсіндірді. Кейін салған суреттерін насихаттағанды жөн көріп, «Фейсбук» әлеуметтік желісіндегі өзімнің жеке парақшам арқылы жарияладым. Сол-ақ екен әлеуметтік желі қолданушылары оның суретшілік өнерін жоғары бағалап, көптеген пікірлер қалдырды. Сондай-ақ жекеме шығып, оның байланыс нөмірін сұраушылардың қатары көбейді. Оларды Ұлбосынның күнделікті жұмыс барысы сурет әлемінен мүлдем алыс екені, яғни талантты қыздың аудандық экономика және бюджеттік жоспарлау бөлімінде еңбек ететіні таңғалдырды. Сондықтан көбісінде «Неліктен сурет­ші мамандығын меңгермеген?» деген сұрақ туындады. Әрине, бұл оның өз таңдауы шығар, бірақ ол кәсіби суретші болғанда сөзсіз бүгінгі туындыларынан да тамаша суреттерді өмірге әкелген болар еді.


– Сурет салу бала күнгі қызы­ғу­шылығым. Көбіне табиғатты, түн­гі аспанды, сондай-ақ бозбала мен бой­жеткеннің суреттерін салған ұнайды. Кәсіби суретші болмаған­дық­тан тек қара қаламды ғана қол­данамын. Достарым кейде маған қа­ламдар сыйлап жатады. Оны ұқып­­ты пайдаланып, бос уақытымда көңілім қалаған бейнелерді ақ қағаз бетіне түсіремін. Бірақ, бұл қызығушылығым тек қолымның бос кезінде ғана орындалады. Күнделікті жұмысым не­гізгі міндетіме сәйкес экономика және бюджеттік жоспарлау бөліміне қатысты жұмыстарды атқарумен өте­ді, – дейді Ұлбосын бізбен әңгімесінде.

Осы ретте талантты тұлғалардың ма­мандық таңдауына қатысты қабыл­даған қызықты шешімдері еске түседі. Мысалы ақын Мұқағали Мақатаевтың заңгер мамандығы бойынша білім алғанын біреу білсе, біреу білмейді. Сондай-ақ Әбіш Кекілбаевтың жазу­шылық қырынан бөлек құрметті полковник деген атағы бар екен. Ал Олжас Сүлейменов геология факуль­тетінің түлегі. Бірақ, олардың әдебиет әлемінде, қоғамдық қызметте танылуына таңдаған мамандықтары еш кедергі келтірген жоқ. Бойдағы таланты, икемі жарқын жетістіктердің бас­тауына айналды. Сол секілді мүм­­­­­­кін әуесқой суретші Ұлбосын Мұ­қам­­­­бетқалиқызының болашақтағы ба­­­­­­қыты сурет әлеміне байланысты шы­ғар. Бәлкім, ол ауданның бүгіні мен өткенін бейнелейтін суретші болар. Қалғаны уақыт пен мүмкіндіктің енші­сіндегі іс.


Әуесқой суретшінің айтуынша, ау­дан­да өзі секілді талантты жастар көп. Оларға қолдау көрсетіп, талабы мен талантын ұштап, сенім артса жақсы-жақсы туындылар өмірге келеді дейді суретші.

– Мен өз мамандығымды, қыз­метімді ұнатамын. Сурет салу – хоб­биім. Салған суреттерімді әлеуметтік желіде бір шумақ өлеңмен бірге жариялап келемін. Кейде таныстарым салған суреттеріме қызығып, жоғары бағалап жатады. Мұндай сәттер маған қуаныш сыйлайды. Бірақ, бұл өнерге біржолата бет бұру ойымда жоқ. Себебі, мамандығым өзіме ұнайды, есеп-қисап саласының қыр-сырын үйреніп келемін, – деген Ұлбосын ауданда әуесқой суретшілердің көрмесі ұйымдастырылса, қуана-қуана қаты­сатынын атап өтті.

Сурет өнері – ықылым заманнан өз құндылығын, қоғамға қажеттілігін жоғалтпай келе жатқан өнер. Ал шығармашылыққа жаны құмар Ұлбо­сындай жастар бар кезде сурет өнері өз өміршеңдігін жоймасы анық. Тек өнердің қадір-қасиетін бағалай білу қажет. Суретші қыздың сырлы әлемі алдағы уақытта тамаша туындылармен толыға түсетініне сенеміз.

Ақтөре ИБРАГИМҰЛЫ

19 қыркүйек 2020 ж. 1 722 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам