Ең жоғарғы балл – 120
Биылғы мектеп бітіруші түлектер үшін елдегі жағдай өз әсерін тигізді. Себебі білім сынағына қызу дайындық жүргізетін мезгілде оқушылар мұғалімдермен қашықтан байланысып, үйлерінде отырып, өз беттерінше ҰБТ-ға дайындалуға мәжбүр болды.Соңғы оқу тоқсанын қашықтан оқыған түлектер білім сынағын жылдағы дәстүр бойынша Қызылорда қаласындағы №2 «Мұрагер» мектебі базасына барып тапсырды. Маусым айының 26, 27, 28 күндерінің қорытынды мәліметі бойынша аудан мектептерінің бітіруші түлектерінің арасында ең жоғарғы балл алған №42 Қ.Баймағанбетов атындағы мектеп-лицейдің оқушысы Аружан Сәлімгерейқызы болды. Бұл қуанышты хабарды бізге аудандық білім бөлімінің бас маманы Ляззат Мығымбаева жеткізді. Жас талапкер мүмкін болған 140 балдан 120 балл жинады. Жас түлектің қуанышына ортақтасып, ұстаздар қауымын, ата-анасын біз де құттықтаймыз.
Жалпы ҰБТ-ны 26 маусым күні тапсырған №210, №132, №191, №37 мектептің 87 оқушысының арасынан №210 О.Әбілпаттаев атындағы орта мектептің оқушысы Мәлике Нұрланқызы 107 балл алып, көш бастады. Бұл осы күнгі ең жоғарғы көрсеткіш болды. Орташа балл – 73,7.
27 маусым күні ауданнан №126 орта мектептің 7 оқушысы сынаққа кірді. Бұл күні ең жоғарғы көрсеткіш 85 балды құрады. 28 маусым күні №42, №44, №147, №131 мектептің 60 түлегі білім сынағында барды. Төрт білім ордасынан №42 Қ.Баймағанбетов атындағы мектеп-лицей оқушылары дараланды. Осы білім ордасының түлегі Аружан – әзірге ауданда ең көп ұпай алған мектеп бітіруші.
Сондай-ақ осы күні жоғары балл жинағандардың қатарында №131 Т.Қозыбаев атындағы орта мектеп түлегі Асылбек Серікбаев та бар. Ол 113 балл жинап, жақсы нәтиже көрсетті.
Үш күннің қорытындысы бойынша 17 оқушы 100 балдан жоғары алды.
29, 30 маусым күндері ауданның №36, №135, №129, №35, №137, №139, №130, №174 мектептерінен 109 оқушы білім сынағын тапсырды. Оның қорытындысы газет дайындау барысында белгілі болмағандықтан, газетіміздің келесі санында жарияланатын болады.
– Оқушылардың барлық санитарлық талаптарға сай сынақ тапсырулары қатаң бақылануда. Аудандық білім бөлімі тарапынан қажетті қорғаныш құралдары мен ішетін суы жеткілікті мөлшерде таратылып берілді. Ереже бұзушылық немесе сынақтан шеттетілген оқиға орын алған жоқ. Оқушылардың қауіпсіздігі қадағаланып, мұғалімдер тарапынан барынша күш салынуда. Бастысы, балалар аман-есен, жақсы көңіл-күймен сынақ алаңынан шығып жатыр, – дейді бізбен байланысқа шыққан білім бөлімінің бас маманы Жанар Қойшығұлова.
Жас түлектердің арман-мақсатына жету жолында 11 жыл бойы білім берген ұстаздардың еңбегі көрінетін сәт келді. Баласы бәйгеге шапқанда үйде отырып тақымын қысып отырған ата-аналардың да жағдайы белгілі. Бастысы бас аман, ел тыныш болсын. Себебі өмірдің сынағы бір ғана ҰБТ-мен бітпейді, мұны көзі ашық жас түлектер көкірегіне тоқып алғанына сенім білдірейік.
Бибісара ЖАНӘЛІ
