Тіршілік тынысы Tirshilik-tynysy.kz ақпараттық агенттігі
» » Орманды өрттен сақтайық

Орманды өрттен сақтайық

Өрт – тілсіз жау. Оның қоршаған ортаға тигізер зардабы орасан зор. Орман өртін болдырмау мақсатында «Сырдария орман және жануарлар дүниесін қорғау жөніндегі мемлекеттік мекемесі» КММ-де өртке қарсы қызмет тобы құрылған. Қызмет тобы ұзақ мерзімде орман пайдаланушылар әзірлейтін өртке қарсы бірлескен іс-қимыл және іс-шара негізінде жос­парлы жұмысты атқарып, қоршаған ортаны өрттен сақтауға қарқынды жұмыс жүргізуде. Ол үшін өртке қарсы қызмет тобы арнайы техникамен қамтамасыз етілген. Яғни тө­тенше жағдай орын алғанда 2 трактор соқасымен, 2 «Газ-53» автокөлігі, «МТЗ-82» тракторы тіркемесімен, «Уаз» және «Нива» техникалары өртті тоқтатуға қатыстырылады.
Қазіргі көктем-жаз айларында өрт қаупі жоғары. Осыған орай мекеменің орман өрт сөндіру қызметкерлері өрт бақылау мұнараларында кезекшілік ұйымдастырып, бақылау жүргізуде. Орманды өрттен қорғау минералды жолақтар жоспары бойынша 40 шақырымға жаңадан жүргізіліп, 60 шақырым ескісі жаңартылып, күтім жасалды. Минералды жолақтардың ені 6 метрге дейін ұлғайтылды.
Орман өрті азаматтардың демалыс кезінде отты дұрыс пайдаланбауы­нан немесе өрт қауіпсіздігі ережесін сақтамауынан туындап жататыны жасырын емес. Сол себепті көктемде шаруашылықтар егістік алқаптарды, бақшалық жерлерді пайдаланушылар өздеріне тиесілі жерлерді өртеу барысында және табиғат аясына шыққан азаматтар өрт қауіпсіздігін қатаң сақтауы тиіс. Сондай-ақ тұрғындар ашық отты қолданудан аулақ болу қажет. Орман – біздің байлығымыз. Сондықтан орманды сақтау, қорғау – бәрімізге ортақ.

Бауыржан КҮЗЕМБАЙ,
аға өрт сөндіруші
19 мамыр 2020 ж. 1 129 0