Балаларға көңіл бөлген абзал

Бүкіл әлем бойынша коронавирус індеті жайылуына байланысты елімізде төтенше жағдай жарияланғаны белгілі. Осындай қиын-қыстау күндері барынша балаларға көңіл бөлген абзал.  Үнімі коронавирус пандемиясы кезінде балаңыздың психикалық жағдайына ерекше мән беру керек. Әлем бойынша белең алып жатқан сындарлы сәтте  балаңызды тыныштандыру маңызды. Бүгінде мектеп оқушылары қашықтан білім алуда. Сондықтан психолог маман ретінде  карантин  талаптарын балаңызға түсіндіруге шақырамын. Баланың күйзеліске түспеуін, қауіпсіздік ережелерін сақтауын қадағалауға ата-ана міндетті.  

Күнделікті балғындардың әр сұрағына  нақты жауап беріп, үрейден бойын алыс ұстаңыз.  Өйткені, олар өте сезімтал болып келеді. Айналаға түрлі көзқараспен қарайды. Ата-ана ұл-қызымен сөйлесу үшін ыңғайлы уақыт табу керек.   Елдегі орын алып жатқан ахуал жайында жіті түсіндіруіміз қажет. Бетперде  тағуды, қолдарын жиі жуып жүруді дағдыға айналдыру керектігін айту парызымыз.

Мемлекеттің баға жетпес қазынасы – адам үшін  күн-түн демей  індетпен күресіп жатқан  ел азаматтарының амандығын тілеуді балаларымызға үйретейік. Шындығында сабырлық танытып, ұрпағымыздың денсаулығына бей-жай қарамайық. Тек шыдамдылық танытып, үйде болайық.  Көңіл-күйімізді бақылауда ұстап,  кеселмен күресейік. Күйзеліске түсу  балаларға қатты әсер ететіндігін ұмытпайық. 

Гүлсара Батишева,

№35 Иса Тоқтыбаев атындағы мектеп- лицей педагог-психологы