Тіршілік тынысы Tirshilik-tynysy.kz ақпараттық агенттігі
» » "Алтын қалам" иегері

"Алтын қалам" иегері

Өздеріңіз білетіндей, соңғы уақытта «Ұжым мақтанышы» айдары бойынша аудандық газет редакциясының қызметкерлері жөнінде өз ойымды жазып жүрмін. Бұл Нұр-Сұлтан, Алматы, Түркістан облыстарындағы таныс азаматтарға ұнапты және олар да өздері қызмет атқаратын мекемедегі әріптестері жөнінде жазуды бастағаны мен үшін жақсы жаңалық болды. Бүгін сол үрдіс бойынша Сіздерге Сырдария аудандық «Тіршілік тынысы» газетінің жауапты хатшысы, Қазақстан Журналистер Одағының мүшесі Шаһарбек Нұрсейітов жөнінде жария етпекпін.
Іргелі ұжымының мақтанышы әрі жас буынның ұстазы Шаһарбек Нұрсейітовтің есімі Сырдария ауданына ғана емес, Сыр өңірі мен Ақтөбе аймағына да етене таныс. Өйткені, кейіпкерімнің еңбек жолы Тереңөзек ауданында басталғанымен абыройлы жұмыстардың жауапкершілігімен көршілес облыста да біраз жыл еңбек еткен. Қуатты қалам иесі өмірдің барлық кезеңін абыроймен өткеріп, бүгінде асқаралы алпыстың биігінде жақсы аға, жақсы әке, жақсы жар, жақсы ата болып қуанышқа кенеліп жүр.
Аудандық газеттің жауапты хатшысы Шаһарбек Нұрсейітов 1957 жылы Тереңөзек ауданына қарасты Қараөзек ауылында дүниеге келген. 1974 жылы аудан орталығындағы №35 орта мектепті бітіріп, үлкен өмірге жолдама алған азаматтың алғашқы еңбек жолы СПТУ-88 мекемесінде лаборант, тәрбиеші болып басталған. Кейіннен Жезқазған қаласында біліп алып, білім саласындағы жемісті еңбек жолын жалғастырған Шаһарбек Балтабайұлы 1985 жылдан бастап журналистика саласына қызмет ауыстырған.
«Журналистика саласында еңбек еткен маман кез келген салада жемісті қызмет істей алады» депті мемлекет және қоғам қайраткері Шерхан Мұртаза. Осы сөз Шаһарбек Балтабайұлының жемісті еңбек жолына қарата айтылғандай. Себебі, білім саласында биік белестерді бағындырған ол мемлекеттік қызметте де өзіндік қолтаңбасын қалдырған. 2000 жылдары Мұғалжар ауданы әкімінің баспасөз хатшысы болған ол жетекші маман, бас маман, бөлім меңгерушісі қызметтерін де абыроймен атқарған.
Жалынды жастық шағында көршілес облыста жұмыс істеп тәжірибе жинақтаған азамат 2007 жылы өзі туып-өскен Тереңөзекке келіп, аудандық газетте еңбек жолын жалғастырған. Алғашында сектор меңгерушісі болған қаламгер 2011 жылдан бастап аудандық басылымның жауапты хатшысы. Ол кісіні өзге журналистерден ерекшелейтіні, тақырып талғамайды. Қаламы жүйрік. Кез келген саланың бүгіні мен ертеңін һәм болашағын қаламына арқау етіп, зерттеп, зерделесе, ол тақарыпқа қайта айналып соғудың қажеті жоқ. Себебі, бірнеше кітапқа жүк боларлық дүниені шағын мақалаға-ақ сыйғызып, мақаласының мәні мен маңызын нақты дәлелдермен айшықтап, ойлы оқырманға керемет туындыны тарту еткенде сүйсінесіз, қызыға қарайсыз. Көзі қарақты оқырман мұны әлдеқашан-ақ мойындаған.
Шаһарбек Балтабайұлының көпшілікке үлгі етерлік тағы бір қыры өте ізденімпаз. Қашан көрсеңіз де аудан тарихын, тұлғалар өмірін зерттеп, мәліметтер жинақтап жүреді. Соның негізінде ол бүгінде бірнеше кітаптың авторы атанды. Оның ішінде Нағи Ілиясов ауылындағы іргелі істер керемет суреттелген «Ауыл адамдарымен көрікті» атты кітаптың орны ерекше. Ол кітапты оқыған адам берекелі ауылға бармаса да барып келгендей күй кешеді. Ал жасындай жарқ етіп, бақиға бағыт алған құқық қорғаушы Талғат Қозыбаевтың өмір жолы өрнектелген «Жалындап өткен жиырма бес» кітабын іздеушілер әлі де көп. Сондай-ақ былтыр жарыққа шыққан «Тереңөзектің түлектері» атты тамаша кітабы балалық балдәурен кезеңін сағынған қаншама азаматтың жанына жұбаныш болды десеңізші... Бұл қаламгер қаламынан туған туындылар оқырман қауым арасында жоғары сұранысқа ие деген сөз.
Қаламгер қоғамдық іс-шаралардың тұрақты қатысушысы. Ол аудандық мүшәйралардың басы-қасынан табылып, жастарға ақыл-кеңесін айтып, бағыт-бағдар беріп келеді. Сондай-ақ кітапхананың да тұрақты оқырманы. Елбасы төрағалық ететін «Nur Otan» партиясының белсендісі. Партияның аудандық филиалы жанындағы сыбайлас жемқорлыққа қарсы күрес жөніндегі Қоғамдық кеңестің төрағасы. Қазақ тілінің жанашыры. Ағайдың мұның бәріне үлгеруі отбасындағы ырыс пен ынтымаққа байланысты деп ойлаймын. Өйткені, асыл жары Фатима апайдың, ұлы Дәуіржан ағамыздың Шаһарбек ағайды құрметтеуі кез келген перзент үшін өнеге. Қазаны оттан, ерлері аттан түспеген әулетке бақ қонып, қыдыр ұялаған. Лайым, баянды болсын!
Ағайдың бақыты – мамандығы мен ұрпақтары. Мамандығы бойынша бағындырған белесінде есеп жоқ. 1988 жылдан бастап КСРО Журналистер одағының мүшесі. ҚР Байланыс және ақпарат министрінің Құрмет Грамотасымен марапатталған. Nur Otan Партиясы Төрағасының бірінші орынбасарының, облыс, аудан әкімдерінің, басқарма, департамент басшыларының Алғыс хаттары бір төбе. Кеудесінде жарқыраған медалдары да қажырлы еңбекке берілген лайықты баға іспетті. Оның ішінде «Сырдария ауданының 90 жылдығы» мерекелік медалінің орны ерекше. Себебі, Туған жерден алған алған марапат кез келген азамат үшін қымбат. Айта кету керек, былтыр Сырдария ауданының әкімі Руслан Рүстемов «Ақпарат саласының үздігі» деген арнайы атақ беріп, «Алтын қалам» аталымы бойынша марапат биігінен көрінді. Мұның барлығы ағай үшін мерей болса, біз үшін мақтаныш.
Бүгінгі жазбамда ағайдың менің анамның сыныптасы екенін айтпай кеткенім жарамас. Анамның сыныптасы болған соң ағай мені өз перзентіндей көреді. Әрқашан тілекші, ақылшы. Арқасүйер жан барлық бастамаларыма қолдау көрсетіп келеді. Түптеп келгенде, осындай ардақты азаматтардың арқасында аудандық газет редакциясының табалдырығы төр, төрі тұғыр болып тұрғаны анық. Ендеше, ұжым мақтанышы атанған ақылшы ұстазымыз Шаһарбек ағайдың өмірі ұзақ болсын!

Ақтөре ИБРАГИМҰЛЫ 
17 сәуір 2020 ж. 464 0