Азық-түліктің арзанын іздесеңіз

Қазір азық-түлік бағасын тұрақтан­дыру – өзекті мәселе. Бұл тарапта «ай­лық шайлыққа жетпейді» дейтін жұрт­шылықтың айтар базынасы да көп. Бір базар мен екінші базар, бір дүкен мен екінші дүкеннен біркелкі баға таппайсыз. Сол себепті де көпшілік 5-10 теңге арзан болса, сол сауда орнына қарай ағылады.

Азық-түлікті 5-10 теңге емес, нарық бағасынан 50-100 теңгелеп арзандатып сатуға кәсіпкерлердің бара бер­мейтіні анық. Бірақ халыққа қызмет етуде әлеуметтік жа­уап­кершілікті сезінетін аудан орталығындағы «Жазира» дүкенінің иесі Галина Сәрсенбаева осындай игілікке бас­тамашылық етті. Атап айтқанда, ең қажетті саналатын 9 түрлі азық-түлікті арзандатып сатуда.

– Кәсібімізді дамыту және халықты азық-түлікпен қам­тамасыз ету үшін жан-жақты жұмыс жасаудамыз. Осы мақ­сатта сауда дүкенін кеңейтуді жүзеге асырып жатырмыз. Қазір базар бағамы айтарлықтай қымбаттағаны жасырын емес. Осы ретте, біз тұрғындарға, оның ішінде тұрмысы төмен отбасыларға қолайлы болсын деген ниетпен қажетті деген азық-түлік бағасын уақытша арзандатып сатудамыз, – дейді Г.Сәрсенбаева.

Кәсіпкердің айтуынша, бұл бастама осы жылдың 7 мау­сымынан басталып, апта соңына дейін жалғасын таппақ. Мүмкіндік болып жатса, әрі қарай жалғастыруға ниетті.

Енді халыққа түсінікті болу үшін 9 түрлі азық-түлік ба­ғасын тарқатып, салыстырып айтайық. Мәселен, тазар­тылған күріш аудандағы сауда орындарында 250 теңгеден жоғары сатылуда. Ал «Жазира» сауда дүкенінде 200 тең­геден. Ал қарақұмық жармасы (гречка) 550-620 теңге болса, мұнда 435 теңге, рожки 290-300 теңге болса, «Жазирада» 240 теңге. Сондай-ақ өзге сауда орындарында 80-85 теңгеден сатылып жатқан нан бағасы бұл дүкенде 70 теңгеден, литрі 770-860 теңгеден сатылымдағы күнбағыс майы 650 теңгеден, келісі 550-600 теңгеден сатылымдағы құмшекер 480 теңгеден сөреде тұр. Оған қоса, бақша да­қылдары қырыққабат 20 теңгеге (200), басты пияз 50 теңгеге (175), картоп та 50 теңгеге (210) арзан сатылуда. Айта кетерлігі, бұл арзандатылған бағада азық-түлік мөлшерлеп сатылады. Яғни, бірден 5-10 келілеп ала алмайсыз, тек 1-2 келі көлемінде сауда жасайсыз. Өйткені азық-түлік қоры бірден таусылып, оның игілігін көпшілік көрмей қалуы ықтимал. Кәсіпкер бір отбасы 1-2 келілеп қажетті азық-түлікті сатып алса, соның өзі 3-4 күнге жететінін айтады.

– Біз кәсіпкердің бастамасына қолдау білдіреміз. Себебі қазіргі таңда баға тұрақтылығын сақтауға басты басымдық берілген. Осы бағытта жұмыс жасап, осы бағаның сақта­луына қолдау көрсететін боламыз, – дейді аудандық ауыл шаруашылығы бөлімінің басшысы Нұрбол Жұмабеков.

Расында, алдағы уақытта мұндай игі іс жалғасын тауып жатса, халыққа үлкен көмек болмақ. Тиісінше, басқа сауда дүкендеріндегі баға да арзандай түсетіні айқын.

Е.ЖАППАРБЕК