Баға бағамы: Өзгеріс бар ма?

Соңғы жылдары теңгенің нарық­тағы бағасының өзгеріске ұшырауы халық тұтынатын тауарлар бағамына тікелей әсерін тигізді. Оның салдары азық-түлік бағасының күрт өсуіне себепші болды. Базар бағамында тұ­рақтылықтың болмауы халықты ти­тықтатып, оның қандай жағдайға ду­шар еткенін өздеріңіз білесіздер! Елдегі жағдайдан кейінгі базар ба­ғамында өзгеріс бар ма? 

Біздегі «әдет» айлық есептік көрсеткіште өзгеріс, зейнетақы немесе айлық табыс кө­­теріле қалса, базар бағамы да шарық­тай түседі. Содан мұқым ел табысына 2-3 мың теңгенің қосылғанынан еселеген шы­ғын­ға ұшырайтынына наразы болады. Жыл ба­сын­­дағы жағдайдан соң Үкіметке бағаны тұ­рақ­тан­дыруға тапсырма беріл­ді. Әзірге ай­тар­­лықтай өзгеріс орын ал­ғанын бай­қаған жоқпыз. Десе де азық-түлік баға­сының қым­бат­­тамауы бақылауда секілді. 

Негізі ауданда халыққа қолайлы бағада азық-түлік тауарларын сатып алатын базар жоқ болғандықтан сырдариялықтар қа­жет­ті тұтыну заттарын сауда орталығы мен азық-­түлік дүкендерінен сатып алады. Ба­зарға қарағанда дүкендерде азық-тү­лік ба­ға­сында айырмашылық бар екені жасырын емес. Оның үстіне бізде көтерме сау­да орын­дары да жоқ. Сондықтан ауданда тапқан та­бысының біразын азық-түлікке жұмсай­тын­дар аз емес. Ал кейбір тұрғындар қалаға жақын болғандықтан азық-түлікті облыс орта­лығынан тасып әуре.

Көтерме бағамен сатып алған азық-тү­лік тауарлары аудан дүкендерінде әркелкі баға­мен сатылуда. Олардың арасында әжеп­тәуір айырмашылық бар. Бұл дүкендер арасында бақталастық туғызып та отыр. Соның әсері болар, бүгінгі күні азық-түлік кент орта­лығындағы «Серікбол», «Ақжол», «Жазира» және басқа да санаулы сауда дүкендерінде әзірге тұрғындарға қолайлы бағада сатылуда. Тиісінше, тұрғындардың көпшілігі осы дүкен­дерден сауда жасап келеді. Ал ауылдық елді мекендердің кейбірінде шағын маркеттер бар. оларда да әзірге баға тұрақтылығы қалыптасқан. Ал қалған дүкендерде аудан ор­талығына қарағанда әжептәуір қымбат еке­нін көріп те жүрміз.

Аудандық ауыл шаруашылығы бөлімі әлеу­меттік маңызы бар 19 азық-түлік та­уар бағасына салыстырмалы түрде статистика жүр­гізіп отырады. Сол бойынша бүгінде өзі­міз өндіретін ақталған күріштің келісі 220 теңгеден сатылуда. Сондай-ақ макарон өні­мінің келісі 230 теңгеден, ас тұзының келісі 45 тең­геден және сары май 1000 теңгеден сатылымда. Бұдан бөлек, 2,5 пайыз майлылығы бар пастерленген сүт 230 теңгеден, 2,5 па­йыз майлылығы бар қатық 240 теңгеден, 5-9 пайыз майлылығы бар ірімшік 680 теңгеден, ақбас қырыққабаты 215 теңгеден сөрелерде тұр. Оған қоса, бірінші сортты бидай ұнының 1 келісі 170, нан бағасы 85, он жұмыртқа бағасы 370, қант келісі 325, күнбағыс майының литрі 700 теңге болған. Маусымына қарай бақша дақылдарының бағасы да әркелкі өзгеріп оты­­рады. Жаз шықса, арзандайды, қыс келсе, қымбаттайды. Күнделікті тұтынатын еттің бағасы да бүгінгі күні қымбат. Тауық еті 900 теңге болса, сиыр еті 2000 теңгеден асып жығылады. Ал жыл­қы еті болса осы күні шамамен 2200 теңгеден сатылып жатыр. Бұл бағалар кейбір дүкендерде сақталғанымен, кейбірінде қымбаттау. Негіз­гі айырмашылық 10-15 теңге және одан да жоға­ры болуы мүм­кін.

Мемлекет басшысы «Алдағы үш жылда азық-түлік қауіпсіздігі мәселесін түбегейлі ше­шу қажет. Бұл Үкімет пен әкімдердің алдында тұрған негізгі басымдық екеніне айрықша назар аударамын. Егер нарықта азық-түлік тауарлары мол болмаса, инфляцияны ұстап тұруға ешқандай шара көмектеспейді» деп атап көрсетті. Сондықтан да Үкімет мүшелері азық-түлік бағасын тұрақтандыруда кешенді жұ­мыстар атқарады деп сенейік.

Ердос БЕРКІНБАЕВ