Медицина қызметкерлеріне үстемақы беріледі
![](/uploads/posts/2020-04/1586842853_bez-nazvaniya-48.jpg)
Бүгінде облыс көлемінде медицина қызметкерлеріне үстемақы беру бойынша тиісті шаралар қабылданды. Бұл ретте Өңірлік коммуникациялар қызметінің фейсбук әлеуметтік желісіндегі ресми парақшасында Қызылорда облысында СОVID-19 короновирусы инфекциясының профилактикасына және таралуының алдын алуға бағытталған эпидемияға қарсы іс-шараларға тартылған денсаулық сақтау ұйымдары жұмыскерлерін қаржылық қолдау ұйымдастырылғаны жарияланды. Яғни, 1 тәуекел тобына жататын инфекциялық стационардағы барлығы 33 маман қосымша 5,1 млн теңге, 2 тәуекел тобына жататын провизорлық стационардағы барлығы 177 маман қосымша 36,4 млн теңге, 3 тәуекел тобына жататын карантинды стационардағы барлығы – 156 қызметкер қосымша 12,9 млн теңге үстемақы алады. Барлығы 366 медициналық қызметкерлерге 54,3 млн. тенге төлеу қарыстырлған.
– Мемлекет басшысы Қасым-Жомарт Тоқаев Төтенше жағдай режимін қамтамасыз ету жөніндегі мемлекеттік комиссияның отырысында сөйлеген сөзінде: «Медицина қызметкерлерінің індетті жұқтырып жатқаны алаңдатып отыр. Ауруға шалдыққан бес адамның біреуі – медицина қызметкері» деп атап өткен болатын. Індетпен күресте медицина мамандары өздеріне артылған жауапкершілікті толықтай сезінеді. Біздің мамандарымыз тәулік бойы қажырлы еңбек етіп, індеттің өршуіне барынша тосқауыл болуда. Мұндай сындарлы сәтте медицина қызметкерлеріне үстемақы беру құптарлық жағдай. Ақ халатты абзал жандар мемлекет қолдауын сезінуде, – дейді аудандық арухананың бас дәрігерінің міндетін атқарушы Алия Аманжолқызы.
Балтабай ОРДАБЕКОВ