Тіршілік тынысы Tirshilik-tynysy.kz ақпараттық агенттігі
» » Өзбекстан Әйтеке бидің 379 жылдығы атап өтті

Өзбекстан Әйтеке бидің 379 жылдығы атап өтті

Елдің түкпір-түкпірі мен Қазақстаннан баба ұрпақтары жиылып, мәңгілік мекен тапқан жерде құран бағышталды, деп хабарлайды Хабар 24.

Нұрата өңірінде бұл үшін барлық жағдай жасалған. Таяуда ғана кесене маңынан жаңа қонақүй бой көтерді.

Қазіргі Өзбекстан жерінде қазақтың тарихынан сыр шертетін құнды дерек, киелі жер көп. Орта ғасырда мұнда ұлтымыздың ұлы тұлғалары билік құрып, қызмет қылған. Аймақтағы ұлт пен ұлысты біріктіріп, тірлігін түзу, бірлігін бекем еткендердің бірі - айыр тілді Әйтеке би. Науаи өңірінде мәңгілік мекен тапқан. Нұратаның іргесінде жатыр. Бұл жер сонау заманнан қазақ руларының ата қоныс, киелі мекені іспеттес.

Ербол Еркебаев, "Сейітқұл әулие Әйтебе би" қоғамдық қорының төрағасы:

- Біздің бұл шарамыз жылдан жылға кеңейіп жатыр. Енді бұған жастарды тартасақ деп ойлаймын. Ата-бабасының әділ шешім қабылдағанын, сөз төрелігін айтатын адам болған. Мына керемет кесенені баптау-ұстау да оңай емес. Келген қонақтарға қонақ үй есігін аштық.

Әйтеке би кесенесіне баба ұрпақтары кейінгі 3 жылдан бері үздіксіз жиналады. Биыл тағзым етіп, құран бағыштау міндеті Маңғыстау өңіріндегі тікелей ұрпақтарына жүктелген. Олар Нұратаға күні бұрын жетіп, жергілікті жұртпен жүздесті. Әйтеке би мазары ұдайы назарда. Күтіп-баптау жұмыстары үзілген емес. Биыл кесене маңында арнайы қонақ үй де бой көтерді.

Жанас Пірімбетов, Әйтеке бидің ұрпағы:

- Біз Әйтеке бидің ұрпақтарымыз. Мен өзім Маңғыстауданмын. Осылай асты ұйымдастырып жатырмыз. Өзбекстан басшылығына рақмет. Атамыздың басына кеп, зиярат қылып жатырмыз. Себебі жер Өзбекстандыкі, ата біздікі. 17 ғасырда дүниеге келіп, бар жоғы 56 жыл жыл өмір сүрген Әйтеке би тұтас алаш халқына ардақты. Ел ішіндегі талай даулы мәселені шешіп, байырқалы, берекелі істердің бастауында тұрған. Өзбек халқы да бабаны сол үшін құрметтейді. Сондықтан алдағы 380 жылдық мерейтойын бірлесіп атап өту ұсынылып отыр. Мұндағы мақсат – өткеніміз бен бүгінімізді кең насихаттау арқылы елдердің достығы мен қарым-қатынасын нығайту.
Авторы: Рауан Мыңбаев
19 мамыр 2023 ж. 424 0