КЕДЕРГІЛЕРДІҢ ОҢТАЙЛЫ ШЕШІЛУІНЕ КӨМЕКТЕСЕДІ
Ауданға қарасты ауылдарды аралап, кент орталығындағы қорытынды жиынды ашқан облыстық кәсіпкерлер палатасы директорының орынбасары кәсіпкерлерлікке қатысты облыста 3 ақпараттық-насихат тобы құрылып, аудандарды аралап жүргендігін жеткізді. Олардың негізгі мақсаты – аймақ кәсіпкерлерінің жасап жатқан кәсіптерінде кедергілер кездесіп жатса, көмек көрсету, құқықтарын қорғау, мәселелерінің оңтайлы шешілуіне ықпал жасау.
– Біздің палатаның құрылғанына 4 жыл болды. Барлық ауданда филиалдар жұмыс жасайды. Қолдан келер кәсіппен айналысатын жандарға көмек көрсетеміз. Ол үшін арнайы курстар оқытылады. Бір атап өтерлігі, бұл қызметтердің барлығы тегін жүзеге асырылады, - деген Қожахмет Ілиясов «Бастау» пилоттық бизнес жобасына тоқталып өтті. Қазіргі таңда жоба облыстың 5 ауданында жүзеге асуда. Келер жылы Сырдария мен Жалағаш ауданы тұрғындары осы жобаға қатыса алады. Ол үшін бір ай кәсіпке қатысты курс оқиды. Содан соң бизнес жоба жасап, облыс орталығында қорғайды. Сол арқылы қаржы алып, өз кәсібін бастайды. Биылғы жылы облыс бойынша курс оқуға 1000-ға жуық адам ұсыныс білдірген. Олардың ішінде 821 адам кәсіби білім алып, өз жобаларын ұсынған. Оның 134 жобасы мақұлданған.
Мұнан соң «Ауыл шаруашылығын қаржылай қолдау қоры» АҚ Қызылорда облыстық филиалының маманы С.Нұрсейтов сөз алып, кооперативтерге бөлінген қаржыны айтты. Қазіргі таңда кәсіппен айналысатындар кооперативтерге шоғырланып, қажетті кепілдік қойып, үлкен мөлшерде қаржы алуда. Осы бағыттағы жұмыстарға орай биылғы жылы аудандағы кооперативтерге 180 млн. теңге қаржы бөлінген. Оның 160 млн. теңгесі Ақжарма ауылындағы кооперативке берілсе, қалғаны қоғалыкөлдік кәсіпкерлерге тиесілі. Мұнан бөлек, аудан халқы мал шаруашылығымен айналысу үшін аудандық жұмыспен қамту орталығы арқылы несие алып келеді.
Кездесуде «Қызылорда» өңірлік инвестициялық орталығының маманы А.Айсаутов та өз саласына қатысты мәліметтер берді. Орталық 2014 жылы құрылған. Оның басты мақсаты – ауылдық жерлерде орналасқан кәсіпкерлік нысандарды жеңілдетілген несиемен қамтамасыз ету. 2015-2016 жылы орталық арқылы 1 млрд. 200 млн. теңгені құрайтын 181 жоба жүзеге асқан. Осының негізінде 661 жаңа жұмыс орындары ашылған. Ол уақыттарда несие 7-10 пайыздық мөлшермен берілген. Ал ағымдағы жылы «Нәтижелі жұмыспен қамту және жаппай кәсіпкерлікті дамыту» бағдарламасы бойынша бөлінген 500 млн. теңге 6 пайызбен 100-ге жуық кәсіпкерге берілген. Бұл жобаның артықшылықтарының бірі кепілдіктің нарықтық құнына жетпеген айырмасын «ҚазАгроГарант» мекемесі арқылы алуға болады. Яғни, аталмыш мекеме кепіл болып, мемлекеттен жобаның жетпеген қаржысын қамтамасыз етеді. Орталық маманы келер жылы да аталған бағдарлама бойынша 500 млн. көлеміндегі қаржы кәсіпкерлерге үлестіру жоспарда екенін жеткізді.
Сөз кезегінде Қызылорда облысының кәсіпкерлер палатасының Сырдария ауданындағы филиал директоры Ф.Әбжаппаров филиал жұмысына тоқталды.
– Кәсіпкерлік палатада кәсіпкерлерге құқықтық, бухгалтерлік, заңгерлік кеңестер беріледі. Сондай-ақ, кәсіп көзін ашуға түрткі болып, кездесіп жатқан кедергілердің оң шешімін табуға жұмыс жасаймыз. Бүгінгі таңда ауданда 2000-нан аса кәсіпкер тіркелген. Олардың көбі егін және мал шаруашылығымен айналысады. Жақында ауылдарды аралап, кәсіп иелерінің мәселесін тыңдадық. Көбісінде жер мәселесінде кедергілер бар екен, - деген Фархад Оразалыұлы қандай да бір сұрақ немесе кәсіпкерлік салада қиыншылықтар, кедергілер кездесіп жатса, филиал қызметкерлері көмек көрсетуге дайын екенін атап айтты.
Жиын барысында кәсіпкерлер мамандарға сауалдарын қойды. Олардың біразы мемлекеттік грантқа қатысты сұрақтарын жолдап, нақты жауаптар алды. Кәсіп ашыға ниетті жандарға кеңестер берілді.
Ердос СӘРСЕНБЕКҰЛЫ
Пікір 1 577