Байқау қорытындысы бойынша Нағи Ілиясов ауылдық мәдениет үйі жанындағы «Әуен бағы» ән үйірмесінің өнерпазы Марат Нұрай вокал жанры бойынша жүлделі І орынды иеленді.

Сондай-ақ, аудандық мәдениет үйі жанындағы «Балауса» халықтық би ансамблі байқауда үздік өнер көрсетіп, жүлделі І орынға лайық деп танылды.

Халықтық аспапта ойнау номинациясында Айдарлы ауылынан қатысқан Көзейбай Дәулетхан жүлделі ІІ орынды жеңіп алып, Сыр өңірінің өнердегі әлеуетін тағы бір мәрте дәлелдеді.

Бұл жетістіктер – жас өнерпаздардың таланты мен табанды еңбегінің, сондай-ақ олардың жетекшілерінің кәсіби шеберлігі мен тынымсыз ізденісінің жемісі.

Осы орайда шәкірттерін үлкен өнер додаларына дайындап, шығармашылық жолда бағыт-бағдар беріп жүрген жетекшілерге шынайы алғысымызды білдіреміз. Жас таланттардың қанатын қатайтып, өнерге баулып жүрген ұстаздардың еңбегі әрдайым құрметке лайық.

Сонымен қатар, балаларының өнерге деген сүйіспеншілігін қолдап, олардың жан-жақты дамуына жағдай жасап жүрген ата-аналарға ерекше ризашылығымызды білдіреміз. Бала жетістігі – отбасы тәрбиесі мен ұстаз еңбегінің ортақ жеңісі.

Сырдарияның дарынды жастары алдағы уақытта да ауданымыздың абыройын асқақтатып, жаңа белестерді бағындыра беретініне сенім мол.