Тіршілік тынысы Tirshilik-tynysy.kz ақпараттық агенттігі
» » » Шын жүйріктер – жеңіс тұғырында

Шын жүйріктер – жеңіс тұғырында

Өнер мен білімді қатар ұштастыра білген «Сұлу-ай» шығармашылық өнер орталығының шәкірттері бірнеше республикалық байқауда топ жарып жүр. Өз кезегінде аталған орталықтың «Көркем сөз оқу» үйірмесінің мүшелері Нұрайым Ермек пен Іңкәр Махамбет «Bilim-orkenieti» ұлттық инновациялық ғылыми-зерттеу орталығының ұйымдастыруымен өткізілген республикалық эссе байқауында дараланды.

Білікті маман Аягөз Мұханова жетекшілік ететін үйірме мүшелері «Ауылым – алтын бесігім», «Қазақ тілі – байлығым» тақырыбында эссе жазып, кестелі сөздерімен, көркем ойларымен шығарма мазмұнын жан-жақты аша түскен. Мемлекет басшысы Қасым-Жомарт Тоқаевтың «Тәуелсіздік бәрінен қымбат» тақырыбындағы бағдарламалық мақаласы аясында жүзеге асқан байқаудың қорытынды жиыны Астана қаласында өтті. Республикалық байқауда «Қазақстан дарыны» номинациясы бойынша топ жарып, І орын иегері атанған Нұрайым Ермекке арнайы диплом, мүсінше, төсбелгі табысталды. Ал ұйымдастырушылардың дип­ломымен марапатталған Іңкәр Махамбетке де құрмет көрсетілді. Сонымен қатар оқушылардың жетекшісіне арнайы «Алғыс хат» берілді.

– «Сұлу-ай» шығармашылық өнер орталы­ғының бесарықтық өнерпаздары республикалық байқаудан топ жарғанына бек қуаныштымыз. Астана қаласынан ақжолтай жаңалық жеткенде төбеміз көкке жеткені рас. Бұл ретте, кәсіби біліктілігі жоғары аяулы ұстаз Аягөз Мұханованың еңбегін ерекше айта кеткен жөн. Біздің балғын шәкірттеріміз жоғарғы жетістікте қол жеткізе беретініне сенімдіміз. Айта кетейік, асқарлық суретшілеріміз де кезекті байқауда жүлдегерлер қатарынан көрінді, – дейді орталық директоры Жібек Дайырбек.
Ақиық ақын Асқар Тоқмағамбетов ауылын­дағы «Көркем сурет» үйірмесінің шәкірттері Балнұр Болатбек, Рәния Әбдіразақ, Мирас Уайдаев, «Білім айнасы» республикалық ғылыми басылымының ұйымдастырған «Бояулар құпиясы» байқауында жүлдегер қатарынан көрінді. Аталмыш байқауда Рәния Әбдіразақ ІІ орынды, Балнұр Болатбек пен Мирас Уайдаев ІІІ орынды иеленді. Талапты балғындардың ұстазы Құралай Тағыбаева суретшілерді көркем өнерге баулып, сурет салудың өзіндік әдіс-тәсілін меңгертуде.

Өнермен қатар спортқа бейім жастар аудан көлемінде қаулап өсіп келеді. Анығын айтқанда, Нағи Ілиясов ауылындағы «Дзюдо» үйірмесінің спортшылары киелі Түркістан қаласында өткізілген республикалық турнирге қатысты. Мұндағы татами бәсекесінде сырдариялық 5 спортшы бақ сынады. Оның ішінде 32 келі салмақ дәрежесінде Санат Бақытжанұлы жүлде­лі І орынды иеленді.

– Жыл басынан бері жас спортшылар бірнеше турнирде бақ сынады. Жүлделі орындардан көрінген спортшыларымыз жеткілікті. Орталық басшыларының қолдауымен осы жолы деңгейі бөлек спортшыларға жоғарғы талап қойылатын республикалық жарыста еліміздің түкпір-түкпірінен келген дзюдошылармен ше­бер­­­лік байқастық. Бір жағынан спортшыларымыз өздерінің шама-шарқын бағамдай алды, – деді Аружан Темірғали.

Балтабай ОРДАБЕКОВ
02 сәуір 2024 ж. 90 0