Қызылордалық өнерпаз Бакуде өткен өнер сайысынан жеңіспен оралды
Бүгін кент әкімі Айдын Маратұлы өнерлі жастардың бірі, Сәбира Майқанова атындағы мәдениет Үйінің «Дарын» ән үйірмесінің шәкірті Жанерке Қалмағанбетті қабылдап, Әзербайжан астанасы Бакуде өткен өнер сайысынан жеңісті оралуымен құттықтады, деп хабарлады Kyzylorda-news.kz Кездесу барысында кент әкімі Сыр елінің, тіпті түгелдей Қазақ елінің даңқын асырып, өнерімізді шет ел төрінде танытып жүрген талант иесіне ерекше ризашылығын білдірді.
Сондай-ақ Жанеркеге білім мен өнерді қатар үйретіп отырған №11 мектеп-лицейінің және С.Майқанова атындағы мәдениет Үйінің басшылығына, оның өнер жолындағы ұстазы Асхат Таңатаровқа және өнерлі жұлдыздың ең басты жанкүйері, осындай дарын иесін тәрбиелеп отырған анасы Нұргүл Үсеноваға алғысын жеткізді.
Еске сала кетейік, наурыз айының 28-жұлдызында бауырлас Әзербайжан елінде өткен өнер додасында Жанерке эстрада жұлдызы Жанар Дұғалованың репертуарындағы «Ізін көрем» атты өлеңін шырқап, дүйім жұртты таң қалдырған болатын.
