Тіршілік тынысы Tirshilik-tynysy.kz ақпараттық агенттігі
» » » Ұстаздар рухына тағзым

Ұстаздар рухына тағзым

№35 Иса Тоқтыбаев атындағы мектеп-ли­цейде «Еске аламыз сағынышты жүрек­тен» атты «Білім беру ісінің үздігі» төсбелгісінің иегерлері, ұлағатты ұстаздар Райхан Танабаева мен Мариямкүл Қадырованы еске алу кеші өтті.

Ұлағатты ұстаздардың білім беру мен тәрбие ісіне қосқан үлесін өскелең ұрпаққа үлгі ету, ұрпақтар сабақтастығын жал­ғастыру мақсатында өткен кешке аудандық ардагерлер кеңесінің төрағасы М.Келдібаев, кент ардагерлері кеңесінің төр­ағасы З.Жүсіпбайұлы, білім саласы ардагерлер кеңесінің тө­­р­а­йымы Г.Әбілова, «Сырдария ау­данының әйелдері» қо­ғам­дық бірлестігінің төрайымы Ұ.Жан­әлиева, ұстаздар қауымы, марқұм ұстаздардың ұрпақтары қатысты.

Еске алу кешінің алғашқы сөзін мектеп-лицей директоры­ Ба­қытжан Бақбергенова мен бас­­тауыш ардагерлер ұйымы­­ның төр­айымы Ұлболсын Бекмаған­бе­това алды.

– Дауға салса – алмастай қиған, сезімге салса – қыран­дай қалқыған, ойға салса – қор­ғасындай балқыған, деген керемет сөз бүгінгі кешімізге ар­­қау болған қос ұстазға арнап айтылғандай. Саналы ғұ­мыр­­ларын білім беруге ар­на­ған ұла­­ғатты ұстаздар туралы айтыла­тын естеліктер өте көп. Негі­зінен жақсы адамның, жақсы ұстаздың есімі ешқашан өл­мейді. Жақында Аралдың Бө­ген ауылына жол түсті. Сонда Ар­ғын­бай деген кісінің үйінде оның елуге келіп қалған баласы кезінде Іңкәрдария ауылында оқығанда Райхан апайдың шәкірті болғандығын айтып, осын­дай керемет ұстаздан дәріс алғанын мақтанышпен еске алды. Осындай жылы лебізді Мариям­күл апай туралы да айтудан жалықпаймыз. Өте биязы, көркем мінезді, әдемі келбетімен есте қалды, – деді ардагер-ұстаз Ұлболсын Бекмағанбетова.

Мектеп-лицей директоры Б.Бақбергенова ұстаз­дық жолды дәріптеген алдыңғы буын ұстаз­дарға алғысын білдірді. Еске алу іс-шарасына негіз болған қос ұстаздың өмір жолы мен алар орны ерекше екендігін айтты.

Ардақты ұстаздардың өнеге­лі өмір жолы одан әрі таныс­тырылып, кешке қатысқан замандас ұстаздар А.Ізбасарова, Ш.Есқараева, С.Шамшадинова, С.Оразаева, Б.Сағындықова, З.Тай­­манова өз естеліктерімен бө­лісті.

Өздерінің саналы ғұмырын ұрпақ тәрбиесіне арнап, 30 жылдан астам ұстаздық қызметте табысты еңбек еткен Р.Танабаева мен М.Қадырова Қазақстан Республикасы білім беру ісінің үздігі атанды. Қазақ тілі мен әдебиеті пәнінің мұғалімі ретінде осы пән арқылы оқушыларының тіл байлығы, сөйлеу мәдениеті, ұлттық дүниетанымын қалыптас­тыруда аянбай еңбек етті.

Тағылымы мол кештің екінші бөлімі мектепішілік Мұқағали оқу­лары байқауымен жалғасты.

9 ақпан күні ақиық ақын, Хантәңірінің мұзбалағы Мұқағали Мақатаевтың туғанына 92 жыл толып отыр. Осыған орай, қазақ тілі мен әдебиеті пәні бірлестігінің ұйымдастыруымен «Жырлайды­ жүрек» атты апталық аясында «Ғасырда бір туатын дарабоз» тақырыбында мектепішілік Мұ­қағали оқулары өткізілді. Шы­ғар­машылыққа жаны жақын оқушылар «Айтып өткен ақында арман бар ма?» ақын өлеңдерін мәнерлеп оқу кезеңіне 5-11 сынып аралығында 14 оқушы қа­тысты. Олардың ішінен ақын өлеңдерін нақышына келтіріп жатқа оқыған 5 «а» сынып оқу­шысы Нұрислам Мейрамбеков бірінші орынмен, 6 «а» сынып оқу­шысы Дильнара Спандиярова мен 11 «а» сынып оқушысы Нұрсара Жұма­назарова екінші жүлдемен және 9 «а» сынып оқушысы Анар Төленова үшінші орын алды.

Байқаудың екінші кезеңі – «Жыр эстафетасы» тақырыбында Мұқағали Мақатаевтың «Аққулар ұйықтағанда» поэмасын жатқа оқумен өтті. Бұл кезеңге 4 оқушы қатысып, 7 б сынып оқушысы Төленова Әмина үздік деп танылды.

Үшінші кезең – «Көкірегімде жыр сәулесі маздайды» тақыры­бы­мен Мұқағали ақынға оқу­шылар өз шығармашылы­ғынан арнау оқыды. Жыр бәйгесіне қатысқан 16 оқушының арасынан оза шапқан 10 а сынып оқушысы Асылай Бектасқызы мен 5а сынып оқушысы Нұрасыл Ғалымұлы бірінші орын алды. Екінші орынмен 11 а сынып оқушысы Назым Әбдімұратова және үшінші орынмен 7 ә сынып оқушысы Мадияр Маратұлы марапатталды.

Еске алу кешінде қос ұстаз­дың ұрпақтары алғыстарын біл­діріп, мәнерлеп оқу сайысы­ның жүлдегерлеріне марапат пен ба­ға­лы сыйлықтарды табыстады.

Бибісара ЖАНӘЛІ
14 ақпан 2023 ж. 495 0