Бағы жанған бүлдіршіндер

Білім беру саласының қай бағы­ты да ұстазға үлкен жауап­кершілікті жүктейді. Оның ішінде білімнің баспалдағы саналатын балабақша тәрбиешілері үшін бір-бір үйдің еркесіне өнер мен білім үйретіп, үлкен өмірге бағыттау оңайға соқпасы анық.

Білікті мамандар балаға күнделікті сурет салу, ойнау, әріп үйретумен шектелмейді. Баланың жан-жақты қабілетін дамытып, өнерге баулиды. Өз ке­зегінде түрлі байқауларда додаға қосып, шыңдап жатады.

Апта ағымында аудандағы «Еркін бөбек» бала­бақшасының бүлдіршіндері республикалық ән байқауының облыстық кезеңіне қатысып, аудан намысын қорғап қайтты. «Атадан – мұра» қоғамдық қорының ұйытқы болуымен облыстық филармония төрінде әуелете ән шырқаған балақайлар үшінші орынды қанжығаға байлады.

Райяна Бахытжан мен Кәусар Болат тілі шық­қаннан ән мен әуезге жақын. Бір естіген әуенін мақамға келтіріп, ыңылдап ән салып жүретін бүл­діршіндердің қабілетін музыка жетекшісі Үміткүл Дабылқызы байқап, қос бүлдіршінді де вокалға кәсіби түрде үйрете бастайды. Жетекші әнші бала­пандардың қате жерін жөндеп, сәтті шыққан тұсына мақтап отыруды да ұмыт қалдырған емес. Облыстық байқауға екеуінен дуэт құрып дайындағанда да көп үміт күтті.

«Еркін бөбек» балабақшасының балдырғандары аталған сайыста «Біз бақытты баламыз» әнін талапқа сай орындап шықты. Балғындардың тәрбиешісі Эльвира Іскендірова да топ тәрбиеленушілері сайыста бақ сынағанда залда отырып тақым қысқанын айтады. Ал «Еркін бөбек» балабақшасының меңгерушісі Салтанат Бердалиеваның қуанышында шек жоқ. Аудандық газет редакциясына сүйінші хабарды жет­кізуші де өзі болды.

– Облыстық кезеңнен балабақшамыздан қа­тысқан қос бүлдіршін жүлделі үшінші орынды иеленді. Қызылорда қаласына арнайы барып, қа­ты­сып, қуанып қайттық. Балабақша құ­рыл­тай­шысы Әсет Ахметов кішкентайларға өз атынан сыйлықтар ұсынып, балалар қуанышын еселеді. Ал ауданның, балабақшаның мерейін облыс төрінде үстем еткен музыка жетекшісі Үміт Ерназар апайға алғысымыз шексіз, – дейді ол.
Қуанса, бала қуансын. Ойнай жүріп жақсы қа­сиетті бойға дарытып, ата-ана мен ұстаз үмітін ақтап, аудан намысын қорғаған бүлдіршіндерге біз де құтты болсын айтып, қанаттарың талмасын деп тілектестік білдіреміз.

А.МҰХАНБЕТҚАЛИ