Балабақшамен қоштасты
Жадыраған жаз мезгілінің алғашқы күндерінің бірінде біз балалық шаққа саяхат жасадық. Қалай дейсіз бе?! Аудан орталығындағы №2 «Балдәурен» бөбекжай балабақшасындағы «Қарлығаш» ересек тобының балабақшамен қоштасу ертеңгілігіне қонақ болдық.Әсем безендірілген балабақша ауласында гүлдей жайнаған бүлдіршіндердің кішкентай жүректері алып-ұшып тұрды. Ән айтып, би билеуді, сурет салып, тақпақ жаттауды үйренген балақайлар енді балабақшамен қоштасып, үлкен өмірге – мектепке қадам басады.
Мерекелік ертеңгілікті ашып берген балабақша меңгерушісі А.Шоханова әр істе қолдау танытатын ата-аналарға алғысын айтып:
– Бүгін, міне, кезекті тәрбиеленушілерімізді балабақша қабырғасынан қимастықпен шығарып саламыз. Жыл бойына балабақша бүлдіршіндері үлкен жетістіктерге жетіп, аудандық, облыстық деңгейдегі байқаулардан жүлдемен оралуда. Мұның бәрі – Сіз бен біздің, балғындарымыздың үлкен еңбегі, – деді.
«Қарлығаш» ересек тобында барлығы 25 бала тәрбиеленіп жатса, оның 12-сі биыл балабақшамен қоштасты. Мерекелік іс-шарада кішкентайлар ән айтып, би билеп, ата-аналарының мерейін арттырды. Ойын ойнап, ұтқырлықтарын көрсеткен балалар мектепке баруға дайын екен. Топ тәрбиешілері М.Жапбасбаева мен А.Төлегенова өз баласындай болып кеткен балғындарды қимастықпен шығарып салса, музыка жетекшісі Н.Маханбетжанова мерекелік ертеңгілікті әуенмен әрледі.
Қарап отырсақ, кішкентай балдырғандармен осындай үлкен іс-шараны ұйымдастыру, әр балаға ән мен би үйрету – тіпті оңай шаруа емес. Бұл тұста балабақша тәрбиешілері мен ән-би жетекшілерінің еңбегі орасан. Әр үйдің бір еркесін тәртіпке келтіріп, тәлім мен тәрбиенің негізін қалап жүрген балабақша ұстаздарының елдің жарқын болашағын дайындауда еңбектері зор.
Ұстаздарына тақпақпен алғыс айтқан балақайлар өз армандарын айтып, әуеге шар ұшырды. Ұйымдастырушылар ата-аналарға да ойын ойнатып, мереке көңілді жалғасын тапты. Мерекелік ертеңгілік соңында ата-аналар Г.Оспанова, А.Болат, М.Серікбай сөз сөйлеп, осы балабақшаға балаларын үлкен сеніммен тапсырғандарын, кішкентайларының көп нәрсе үйреніп шыққанын айтып, алғыстарын жеткізді. Осылайша, керемет көңіл-күймен жалғасқан мерекелік іс-шарада біз де балаларға қарап, бал дәуренге сапарлап қайтқандай болдық. Көңілді жиын соңында балабақша меңгерушісі бітірушілерді арнайы «Алғыс хатпен» марапаттап, естелік сыйлық тарту етті.
Аружан МҰХАНБЕТҚАЛИ
