Көрермен көңілінен шыққан кеш

Қай кезде де идеология саласының күретамыры сана­латын мәдениет қоғам өмірінен алыстаған емес. Күн­делікті тоқтаусыз жүріп жатқан саланың тіршілігі өзіндік қиын­дығымен, қы­зығымен өзге қызметтен дараланады. Шың­далу, же­­­тілу, кәсіби тұрғыдан өсу әрбір сала мама­ны­ның ал­ға қойған мақсатына ай­налған. Бұл ретте, мәдениет саласының мамандары үнемі ізденіс үстінде жүреді. Осы орайда, аптаның сей­сенбісінде қажыр-қай­­ра­тымен халық үшін жұ­­­мыс жасап келе жатқан мә­дениет саласының қызмет­кер­лерінің өнеріне тәнті болдық.

Анығын айтқанда, аудандық мәдениет үйінде «Балалар жылы» аясында Айдарлы ауылдық Ғафурдин Жанұзақов атындағы клуб үйінің ұйым­дастыруымен «Өнерпаз болсаң арқалан» тақы­рыбындағы өнер фестивалі жалғасын тапты. Өнер фестивалі барысында дарынды драматург Айжан Атымтаеваның «Кім патша?» ертегі инсценировкасы желісімен дайындалған қойылым көпшілік назарына ұсынылды. 

Адамның таным көкжиегін дамыта түсе­тін әсерлі қойылымды тамашалауға аудан әкімі­­нің орынбасары Димаш Байдушев, сая­си ғылымда­ры­ның докторы, профессор, журналист, қоғам қайраткері Әбдіжәлел Бәкір, айтыскер ақын  Мамыр Бәйдәулетов, «Сырдария ауданының Құр­метті азаматы» Қалдыбек Айтбаев, «Тіршілік тынысы» газетінің бас редакторы Ақтөре Ибрагимұлы, Айдарлы ауылының әкімі Айбол Ержа­нов, халықаралық «Қазақ тілі қоғамы» ҚБ Сыр­дария аудандық филиалының төрағасы Шаһарбек Нұрсейітов,  Тереңөзек кенті ардагерлер кеңе­сінің төрағасы Зайдағали Жүсіпбайұлы, мә­дениет майталманы Сансызбай Сәдуақасов, еңбек ар­дагері Мектепхан Елеусінов, дербес бөлім бас­шылары, аудан меймандары мен тұрғындары арнайы келді.

Көрерменнің көңілінен шыққан концерт Айдар­лы ауылдық Ғафурдин Жанұзақов атындағы клуб үйінің жыл бойы атқарған жұмысын таныстыруға арналған бейнекөрініспен басталды. Негізінен, іргелі ұжым ҚР Президенті Қасым-Жомарт Тоқаевтың бастамасымен Түркістан облы­сында өткен «Рухани қазына – 2022» республикалық фес­тива­лінің арнайы дипломымен марапатталып, Қызылорда облысы бойынша 115 ауылдық клуб­тың ішінен «Үздік клуб – 2022» атанған болатын. Жылды табысты қорытындылап отырған ауылдық Ғафурдин Жанұзақов атындағы клуб үйі жанынан «Тұрмағанбет» өнер мектебі мен «Сұлу-ай» шығар­машылық өнер орталығының бірнеше үйірмесі тұрақты түрде жұмыс жасайды. Әрбір үйірмеде өнерлі өрендер тәрбиеленіп келеді.

Аудандық мәдениет үйінде сахналанған «Кім патша?» ертегісі орман патша­лығына иелік ету үшін таққа таласқан аңдар жа­йында баяндалады. Әрбір аң бір күнге таққа отырып, орманға әмірлік жүргізеді. Өзінің талап-тілегін орындатады. Сан алуан қоғамның бет-бейнесін суреттеген қойылым үлкен мен кішіні терең ойға батыратыны жасырын емес. Осындай мән-мағынасы жоғары қойылымды жарыққа шығарған режисер Рахия Абдукаримова мен суретші Бақытжан Әлтаевтың еңбегі зор.  Ал қойылымды сәтті ойнаған әртістер құрамы бар мақтауға лайық.

Қойылым барысында өнерпаздар ән, би, күй, дәстүрлі музыка, көркем сөз шеберлері өз өнер­лерін көрсетті. Айта кетейік, әнші Ботакөз Смайлова «Ассалаумағалейкум» әнін, «Нұрай» би тобы «Қазақ» пен «Мыстандар» биін, жас домбырашы Дәулетхан Көзейбай «Ерке сылқым» күйін, жыршылар тобы «Ақсиса» және «Тәлім» тер­месін, көркемсөз шебері Нұрислам Амангелді  «Дүрбелең», Аруна Асан мен Сезім Мырзахмет «Кәмила мен Жәмила» сықағын, Айнұр Нұрлан­қызы «Махамбеттің соңғы сөзі» монологын, өнер­паз өрендер «Жан жылуы», «Айдарлы жас­тары» әнін орындап, жергілікті халықтың жоғары бағасына ие болды. Қойылым желісінде өз тағына қайта оралған аң патшасы  арыстанның құрметіне «Көркем сурет» және «Бисермен өру» үйірмесінің мүшелері қолдан жасалған сыйлық тарту етті.

Өз кезегінде саяси ғылымдарының докторы, профессор, журналист, қоғам қайраткері Әбдіжә­лел Бәкір сөз алып, өте қызықты, мағыналы қойы­лым жайында өз пікірін білдірді.

– Бірнеше жылдан бері туған жерім – Сырдария ауданынан жырақта болдым. Қашанда ауданымызда елеулі оқиға орын алса, қуанышпен қа­былдаймыз. Барлық жерлесімізге тілеулестік біл­діріп отырамыз. Бүгін сахнада тамашалаған қо­йылымның композициялық құрылымы, тағылымға толы мағынасы терең болды. Барлық өнерлі жандар ауылдан шығатынына көзіміз жетті. Ұлт рухания­­тын жаңғыртуда мәдениет саласының атқаратын рөлі зор. Өзім туған ауылдың өнерпаздары талантымен көпшілікке танылғаны зор мақтаныш. Ізгілік мұрасын дәріптеп, балаларды өнерге баулу – аса жауапты іс. Осы жолда аянбай еңбек етіп келе жатқан Анар Қалдыбаеваның есімін ерекше айта кеткен жөн. Осыдан бір жыл бұрын аудан бойынша «Сұлу-ай» шығармашылық өнер орталығын ашып, қаншама баланың өнер үйренуіне жағдай жасауда. Алдағы уақытта респуб­ликада аудан жастарының есімі жақсы жағынан шығуына тілектестік білді­ремін, – деді  Әбдіжәлел Бәкір.

Бұдан кейін аудан әкімінің орынбасары Димаш Байдушев ауданға ат басын бұрған Әбдіжәлел Бәкірге қазақтың ұлттық аспабы домбыраны сыйға берді.

– Өздеріңізге белгілі, халқымызда «Өнер – өмір­шең, мәдениет – мәңгілік» деген мағыналы сөз бар. Ал сол өнер мен мәдениеттің алтын бесігі – ауыл десек ешқашан қателеспейміз. Бүгін құт қонып, бақ дарыған Айдарлы ауылының өнерпаздары бізге өз өнерлерін ұсынып, көтеріңкі көңіл күй-сыйлады. Ең алдымен, өнер ұжымын бас­тап келген аудандық мәслихат депутаты, Айдарлы ауылдық клуб үйінің директоры Анар Сражадинқызына алғысымды біл­ді­ремін. Айдарлылық өнерпаздардың бұл тамаша туын­дыны сахнада жоғары деңгейде сомдағанын осыдан бірнеше ай бұрын естігенмін. Сонда өнер саласының өкілдері ауыл өнерпаздарының еңбегін, ізденісін жоғары бағалап, облыстық, ау­дандық деңгейдегі кез келген мәдени-көпшілік іс-шараға ұсынуға болатынын айтқан еді. Сахна­дағы әрбір рөл иесі өзінің кәсіби тәжірибесі мен талантын танытты деп айтуға болады. Бұл – үлкен дайындықтың, маңдай тердің және өзара сыйластық пен бірліктің белгісі. Жалпы, Айдарлы ауылынан елімізге белгілі өнер майталмандары түлеп ұшқан. Олар Сыр мәдениетінің дамуына айтарлықтай үлес қосты. Солардың ізбасары ретінде бүгін Айдарлы ауылының өнерпаздары аудан жұртшылығына тамаша қойылым қойып, жас өнерпаздардың таланты ерекше екенін байқадық. Ұжымға шынайы алғысымызды білдіремін. Алдағы уақытта шығармашылық табыс тілеймін, – деді аудан әкімінің орынбасары.

«Өнерпаз болсаң арқалан» атты өнер фести­валі аясында аудандық мәдениет үйінде көр­­ме ұйымдастырылды. «Шешендік өнер» үйір­месі­нің мүшелері қазақтың 3 биінің образын сомдады. Көрмеде қадірменді меймандар жеке кәсіп­­­кер, атақты ісмер Роза Әлбатырованыңкілем­­шелерін, қолөнерші Сраждин Акимовтің құнды жәдігерін, белсенді жас Ережеп Есенкелді­нің ағаш бұйымдарын, «Бисер өру» және «Көркем сурет» үйірмесінің туындыларын тамашалады. Сонымен бірге көпшілікке Айдарлы ауылы жайында жазыл­ған кітаптардың көрмесін кітапханашы Балзарина Асан таныстырды.

– Бүгінгі кеш барысында ерекше қобалжу болды. Сахнада өнер көрсеткен әрбір айдарлылық өнерпаздың еңбегі ерекше екенін айта кету керек. Сондықтан да олардың өнерін жоғары бағалаймын. Қойылымды тамашалаған кө­рерменнің қошеметін де соны сезініп, біз айрықша сер­піліс алдық. «Өнерпаз болсаң арқалан» атты өнер фестивалі жыл басынан бері жалғасын тап­қан болатын. Әріптестеріміз аудан тұрғындарына жоғары көңіл-күй сыйлады. Қолдау көрсеткен бар­лық жанға алғысымды айтамын, – деді Айдарлы ауылдық Ғафурдин Жанұзақов атындағы клуб үйінің директоры Анар Қалдыбаева.

Айта кетейік, аудан халқына арнап Айдарлы ауылы әкімшілігінің ықылас гүлі сахна төріне қойылды. Сонымен бірге кеш қонақтары «Еңбек даңқы» музейін аралап көрді. Осындай ерекше кеш­тің куәсі болған жергілікті халық шат-шадыман көңіл-күйде тарқасты.

Балтабай ОРДАБЕКОВ