Өнер көзі – халықта
Жақында «Болашаққа бағдар: рухани жаңғыру бағдарламасы және «Балалар жылы» аясында аудандық мәдениет үйінде жетікөлдіктердің «Өнерпаз болсаң арқалан» тақырыбындағы өнер фестивалі өтті.
Өнер фестивалі Жетікөл ауылы жайында түсірілген бейнебаянмен ашылды. Ауыл тарихы мен тұрмыс-тіршілігі, еңбек жөнінде жиналған қауымға кеңінен мағлұмат берілді. Өз кезегінде сахна төріне шыққан ауыл өнерпаздары ән айтты, би биледі. Халықаралық, республикалық, облыстық байқаудың жеңімпазы Д.Кеңесова «Жетікөл жайлы», С.Нұрланқызы «Жетікөл жері» өлеңдерін жатқа оқыды. Ал термеші А.Өтеуов «Өсиет» термесін нақышына келтіріп орындаса, жергілікті өнерпаздар Е.Білманов «Асыл арман», Қ.Бажиева «Бұл ән бұрынғы әннен өзгерек», Ә.Мырзахмет «Мен қазақпын» әнін, Б.Нақыпбек пен Е.Азаматұлы «Туған жер» әндерін шырқады. Сонымен бірге мың бұралған бишілер сахналық қойылым қойды.
– Сыр елі – таланттылар мекені. Аудан орталығынан шалғайда орналасқан Жетікөл ауылының өнерпаздары қазақы өнерді жан-жақты дәріптеді. Жергілікті әнші-бишілердің өнеріне аудан жұртшылығы жоғары баға берді. Қашанда өнерсүйер қауымның қолдауы бізді шабыттандырады. Алдағы уақытта айтулы жыл аясында жобалар жалғасын табады, – деді Жетікөл ауылдық клубының директоры А.Өтеуов.
Балтабай ОРДАБЕКОВ
