Жазушы мұрасы ұлықталды
Ұлттық академиялық кітапханада Мәдениет және спорт министрлігінің қолдауымен «Әбдіжәміл Нұрпейісов: өмір сыры мен шығармашылығы» тақырыбында халықаралық конференция өтті, деп хабарлайды Еgemen.kz.Алқалы жиын Халық жазушысы, КСРО Мемлекеттік сыйлығының лауреаты, Қазақстанның Еңбек Ері Әбдіжәміл Нұрпейісовті еске алуға арналды. Іс-шара барысында отбасы мүшелері мен замандас қаламгерлері автор шығармашылығының қыр-сыры, аудармашылық қызметі, эпистолярлық мұрасы, аудармалары, зерттеулері жайында естеліктер айтты.
Конференцияда Қазақстан халқы Ассамблеясының Достық елшісі Малғожата Туар (Франция), «Altyn Qyran Foundation» ҚҚ қамқоршылық кеңесінің мүшесі Әлібек Алденей, Әбдіжәміл Нұрпейісовтің келіні – Әйгерім Нұрпейісова, прозашы, аудармашы Анатолий Ким (Ресей), жазушы, филология ғылымдарының докторы Уәлихан Қалижан, Ереван мемлекеттік университетінің түркология кафедрасының меңгерушісі, профессор Александр Сафарян, т.б. әдебиетші-ғалымдар баяндама жасап, жазушы мұраларының зерттелу барысына тоқталды. Ал Мәскеу мемлекеттік Халықаралық қатынастар институты, Мәскеу қалалық педагогикалық университетінің Шет тілдер институты, Ресей Аудармашылар одағының Красноярск аймақтық филиалының өкілдері (SPR), Сібір федералды университетінің профессорлық-оқытушылар құрамы (Красноярск) конференцияға онлайн режімде қатысты.
