Құрмет төріндегі жазушы

Мемлекет басшысы Қасым-Жомарт Тоқаев халық жазу­шы­сы Әбдіжәміл Нұрпейісовті қабылдап, «Қазақстанның Еңбек Ері» атағының «Алтын жұлдыз» айрықша ерекшелік белгісін табыс етті. Қазақстан Президенті көрнекті жазушының ұлттық әдебиетіміздің әлемдік деңгейге көтерілуіне қосқан айрықша үлесіне тоқталып, қазақ әдебиетінің абызын 95 жылдық мерейтойы қарсаңында еліміздегі жоғары наградамен марапаттағанын атап өтті.

– Сіз халқымызға керексіз. Сондық­тан Сізге зор денсаулық, ұзақ ғұмыр, шығармашылық табыс, бақ-береке ті­лей­­мін, – деді Қасым-Жомарт Тоқаев.

Әбдіжәміл Нұрпейісов Мемлекет басшысына алғыс айтып, Тәуелсіз Қазақстанды өркендету жолындағы жұмысына жеміс тіледі.

Айта кетейік, қазақ әдебиетінің классигі, көрнекті қаламгер, суреткер-жазушы Әбдіжәміл Нұрпейісов биыл 95 жасқа толды. Ұлт әдебиетінің абызы атанған жазушы «Қан мен тер» атты дәуірнамалық трилогия жазып, отанымыздың ғасырлық тарихын суреттеп берді. Оған қоса «Курляндия» («Күткен күн»), «Соңғы парыз», «Сең» романдары арқылы қаламгер әлем әдебиетінің көрнекті өкілдерінің санатына қосылды.

Бұдан бөлек Қазақстан және КСРО Мемлекеттік сыйлықтарының лауреаты Ә.Нұрпейісов «Қазақ әдебиетіне қосқан елеулі еңбегі үшін» номинациясында «Алтын қалам» әдеби сыйлығының иегері атанды.

«ТТ» ақпарат