«Сырдария» квартеті – үздіктердің үздігі
Сыр мәдениетінің өркендеуіне зор үлес қосып келе жатқан талантты азаматтар баршылық. Үлкен сахнада жұлдыздай жарқыраған бұл жігіттер аға буын өкілдерінің төл ізбасары саналады. Өз тыңдарманын қалыптастырған «Сырдария» квартеті ел көлемінде жан-жақты танылып келеді. Жақында сырдариялық жігіттер Алатау бөктеріне сапарлап келген болатын. Сапар барысында квартет мүшелері толағай табысқа қол жеткізді.Алматы қаласында ұлық мереке аясында өткізілген «Zhuldyz Tv» және «MuzLife» арналарының «Әз Наурыз» атты телевизиялық концертіне «Сырдария» квартеті қатысып, аудан мерейін асырды. Телевизиялық жобаға арнайы шақырту алған аудан өнерпаздары «Уа, дариға» әнінің тұсауын кесіп, «Үздік квартет» номинациясын иеленді.
– Негізінен, «Сырдария» квартеті осыдан 9 жыл бұрын құрылды. Алғаш рет «8 наурыз – Халықаралық әйелдер күні» мерекесінде өнер көрсеткен едік. Квартет құрамында талантты әншілер Дархан Разақов, Дастан Палмахов, Нұрбол Тұранов өнер көрсетеді. Қазіргі таңда жеке топ орындауында 10-нан аса авторлық ән бар. Сонымен бірге халық әндерін, патриоттық шығармаларды орындауды мақсат тұтамыз. Әрине, Алматы сапары бізге тың серпіліс сыйлады. Сапар барысында «Үздік квартет» номинациясын жеңіп алғанымызға қуаныштымыз. «Almaty tv» телеарнасындағы «Таңғы студия» бағдарламасында қонақта болып, «Сырдария» квартетінің 10 жылдық мерейтойын атап өту жоспарымен бөлістік. Қазақ радиосында да тікелей толқынға қосылып, қызықты сұхбат жүргіздік. Тыңдармандардың сауалына жауап беріп, әннен шашу шаштық, – дейді «Сырдария» квартетінің мүшесі Азиз Садықов.
Бүгінде квартетті Сыр жыртшылығы жақсы таниды. Аудандағы әрбір мерекеде квартет жігіттері тыңдарман көзайымына айналып келеді.
Үздіктердің үздігі атанған өнер иелерінің зор жетістігі аудан мерейін үстем етті. Сондықтан шығармашылық ұжымға алдағы уақытта да толағай табыс тілейміз!
Балтабай ОРДАБЕКОВ
