Өзіңді тану – өлкеңді танудан басталады

Халқымызда «Өзіңді өзің жаттай сыйла, жат бойыңнан түңілсін» деген тағылымы мол сөз бар. Расында да біз өзі­міз­дің тарихымызды, құн­дылығымызды өзіміз дәріптеп, насихаттап, зерттеуіміз керек. Осы ретте оқушының санасына ел мен жер тарихын сіңіре алсақ, бұл біз­дің бабалар аманатын орындағанымыздың белгісі болмақ.

Жақында Бесарық ауылындағы №147 орта мектебінің мұғалімі Ақ­марал Байжүнісованың ұйымдас­ты­руымен «Туған жер – менің кіші Отаным» және «Ақылды бейсенбі» жо­балары аясында бірқатар іс-ша­ра өтті. Соның бірі – 7 «ә» сыныбы оқу­шыларының белсенді қа­ты­­­суымен өткізілген «Өзіңді тану – өл­­­кеңді танудан басталады» тақы­ры­бындағы сынып сағаты. Туған ел мен өскен өлкеге құрметті арттыру, ауылдың тарихы мен қалыптасу кезеңдерінен сыр шерту мақсатында ұйымдастырылған сынып сағатына өлкетанушы, Қазақстан Журналис­тер одағының мүшесі, бірнеше кітап­тың авторы Жұмабай Байзақұлы қа­­­тыс­ты. Сынып сағатында мектеп ди­­ректорының тәрбие ісі жөніндегі орын­басары Гүлнұр Тілеубергенова ауыл­дың тарихы тереңде екенін айтып, оқушыларға тың мәліметтер ұсынды.

Өз кезегінде іс-шараның қадірлі қонағы Жұмабай Байзақұлы ауылдың Бесарық деп аталуының сыры мен ел ағалары туралы әңгімеледі. Оқу­шыларға авторлық зерттеу жұ­мыстарын таныстырып, ауыл ма­ңы­нан табылған жәдігерлерді жи­нақ­тап, мұражайға табыстағанын айтты.

– Бесарықтың тарихы осы маңай­дағы бытыраңқы колхоздардың бірі­гуінен басталды. Бұл 1950 жыл еді. Ауыл тұрғындары о бастан мал бағуға да, егін егуге де епті болатын. Ол кезде техника қайда, бейнетті белшеден кешкен бесарықтықтар арықты, каналды қолмен қазды. Шопандар төл алу, қаракөл өндіру сияқты сол дәуірдің «Социалистік жарыс» аталатын аламанында алда тұрды. Сырдың суына сары қауынын, ақ бидайы мен маржанын екті. Қыры мен Қызылына отар-отар қойын, келе-келе түйесін, үйір-үйір жылқысын жайды. Осы ауылда кеуделеріне Кеңес заманының ең жоғары наградалары – «Ленин», «Еңбек Қызыл Ту», «Құрмет белгісі» ордендерін таққан қарапайым ең­бек адамдары өмір сүрді, – деген өлкетанушы Ж.Байзақұлы сынып сағаты аясында мектеп жанындағы мұражайды оқушылармен бірге аралап, экспонаттардың тарихы, маңызы туралы түсіндіріп берді. Оқушыларды сонау VI ғасырда қолдан жасалған су диірменінің табылу тарихы қызық­тырды. Өлкетанушының айтуынша, диірмен Бесарықтан батысқа қарай шамамен 30 шақырым жерде табылыпты. Атап өту керек, сынып сағатында ерек­ше көзге түскен оқушылар Д.Айт­баева мен Ш.Меңлібекке және сынып жетекшісі А.Байжүнісоваға «Жердің аты, тарихтың хаты» кітабы берілді. Осы­лайша оқушылар мол тарихи мәліметтермен танысып, өлке тарихы туралы көп мағлұматтар алып, сынып сағатын жоғары деңгейде қоры­тындылады.

Ақтөре ИБРАГИМҰЛЫ