Әлемнің екінші ұстазы
Әбу Насыр әл-Фарабидің 1150 жылдығына орай «достық» үйінде орналасқан №1 филиал кітапханасының ұйымдастыруымен «ұлы даланың ұлы тұлғасы – Әбу Насыр әл-Фараби» тақырыбында тарихи-танымдық сағат өтті. Оған кітапхананың тұрақты оқырмандары, ҮЕҰ мүшелері, мектеп оқушылары қатысты. Шара барысында әлемнің екінші ұстазы әл-Фарабидің өмір жолы, өлшеусіз еңбегі, ғылыми мол мұрасы жайлы кеңінен мағлұмат берілді. Кітапханашы Л.Серікбаева ғалымның шығармашылығына тоқталды. Өз кезегінде еңбек ардагері М.Елеусінов оқырмандарға әл-Фарабидың еңбектері күні бүгінге дейін өз құндылығын жоймағанын айтты. Әлеуметтік-этикалық саяси көзқарастары мен ел басқару жөніндегі тұжырымдары қоғам үшін маңызды екендігін жеткізді. Негізінен әл-Фараби 150-ге жуық пәлсапалық және ғылыми трактат жазған. Ежелгі Отырар қаласынан қанаттанған ол әлемнің бірнеше елінде болып, білімін жетілдірді. 70-ке жуық тілді еркін меңгеріп, артынан өшпес мұра қалдырды.
Танымдық сағатта мектеп оқушылары «Әлемнің екінші ұстазына» арналған ақындардың өлеңдерін оқыды. Сонымен бірге ғұлама жөнінде түсірілген бейнеролик көрсетілді. Ал кітапханашы «Әл Фараби – әлемнің екінші ұстазы атанған ғұлама» атты кітап көрмесін таныстырды.
Балтабай ОРДАБЕКОВ
