Бірлік пен ынтымақ – ардагерлер ұстанымы

Қоғалыкөл ауылында Сырдария аудандық ардагерлер кеңесінің кезекті алқа мәжілісі өтті. Жиынға аудандық ардагерлер кеңесінің төрағасы Мұса Келдібаев, аудандық әлеуметтік бағдарламалар және жұмыспен қамту бөлімінің басшысы Айнұр Есмағанбетова, ардагерлер кеңесінің мүшелері, ауылдық ардагерлер кеңестерінің төрағалары, зиялы қауым өкілдері мен ауыл ақсақалдары қатысты.

Күн тәртібіндегі алғашқы мәселе – Сырдария аудандық ардагерлер ұйымының 2026 жылдың ІІ тоқсанында атқарған жұмыстарының қорытындысы болды. Бұл мәселе бойынша аудандық ардагерлер кеңесінің төрағасы Мұса Келдібаев жан-жақты баяндап, жүзеге асқан бірқатар жұмысқа тоқталды.

– Қоғалыкөл ауылында өткен кезек­ті Алқа мәжілісі мазмұнды әрі нәтижелі болды. Мәжілісте аудандық ардагерлер ұйымының 2026 жылдың ІІ тоқсанында атқарған жұмысы жан-жақты сараланып, ауылдық ардагерлер кеңестерінің тәжірибелері талқыланды. Бүгінде ауданымызда 4582 ардагер 74 бастауыш ұйымның құрамында ел бірлігі мен қоғамдық тұрақтылықты нығайтуға, жастар тәрбиесіне, ұлттық құндылықтарды дәріптеуге өз үлестерін қосып келеді. Ардагерлер ұйымының қоғамдағы орны айқын көрініспен айқындалуда. Есепті кезеңде «Ұрпақ тәрбиесі – Ұлт болашағы» атты ауқымды кездесу, бірнеше мәрте ақын-жазушылардың шығармашылық кеші, тарихи-танымдық басқосу, қайырымдылық іс-шарасы, мәдени-спорттық іс-шара жүйелі түрде ұйымдастырылды. Денсаулығына байланысты үйден шыға алмайтын ардагерлерге құрмет көрсетіліп, әлеуметтік қолдау іс-шарасы жүзеге асырылды. Аудан ардагерлері облыстық, рес­публикалық және халықаралық деңгейдегі мәдени және спорттық іс-шарада ауданымыздың мерейін үстем етті. Қоғалыкөл ауылдық ардагерлер кеңесінің ұжымына, оның төрағасы Сламбек Каюповқа Алқа мәжілісін жоғары деңгейде ұйымдастырғаны үшін ерекше алғысымды білдіремін. Мәжілісте көтерілген әрбір ұсыныс пен айтылған ой-пікір алдағы жұмы­сымыздың бағытын айқындап, ардагерлер қозғалысының жұмысын одан әрі жетілдіруге тың серпін бере­ді деп сенемін. Ардагерлер – елдің ақылшысы, бірліктің ұйыт­қысы. Сондықтан олардың өмірлік тәжірибесін кейінгі ұрпаққа өнеге ету, қоғамдық бастамасын қолдау және ұйым жұмысын одан әрі жандандыру – бәрімізге ортақ міндет. Ынтымағымыз бекем, бірлігіміз берік болса, атқарар игі істеріміз де мол болады. Барша ардагерге зор денсаулық, отбастарына амандық, ел игілігі жолындағы еңбектеріне толайым табыс тілеймін, – деді Мұса Алпысбайұлы.

Өз кезегінде ардагерлер кеңе­сінің төрағасы аудан көлемінде арда­герлердің әлеуметтік жағдайын жақ­сарту, қоғамдық ұйыммен байланыс орнату, қайырымдылық іс-шарасын ұйымдастыру, жастар тәрбие­сіне бағыт­талған кездесу өткізу, ұлттық құн­дылықты дәріптеу және қоғамдық тұрақтылықты сақтауға бағытталған жұмыстың жүйелі түрде жүргізілгенін атап өтті. Алдағы кезеңде атқарылатын негізгі міндет пен жос­парды саралаған төраға ауылдық ардагерлер кеңес­терінің белсенді жұмысына оң бағасын берді.

Күн тәртібіндегі екінші мәселе бо­йынша Оспан Мәлібаев мөлтек ауданы, Айдарлы және Аманкелді ауылдық ардагерлер кеңесінің төрағалары өз есептерін ұсынды.

О.Мәлібаев мөлтек ауданының ардагерлер кеңесінің төрағасы Ма­ғауия Асқаров жүзге жуық ардагерге түрлі әлеуметтік қолдау көр­сетіліп, қайырымдылық іс-шарасы ұйым­дас­тырылғанын айтты. Ауылдың қоғам­­дық өміріне ардагерлердің белсен­ді араласып келе жатқанын ерекше атап өтті. Ол ауыл тұрғын­дарын толғандырған аяқсу мәселе­сінің толық шешімін тапқанын жет­кізіп, тұрғындардың тұрмыс сапасын жақсартуға бағыт­талған жұмыс­тар­дың нәтижесін баян­дады. Сонымен бірге ауылдық меди­циналық пункт меңгерушілерінің жиі ауысуы тұрғын­дарға қолайсыздық туғызып отырғанын, қазіргі таңда бұл қызмет орны бос тұрғанын айтып, мәсе­лені назарға ұсынды.

Айдарлы ауылдық ардагерлер кеңе­сінің төрағасы Тыныштықбай Әбсадықов ауыл­дағы әлеуметтік-эконо­микалық даму көрсеткіштері туралы кеңінен баян­дады. Оның айтуынша, 2026 жыл­дың алғашқы жеті айында ауылдық округ бойынша 64 адам тұрақты жұмыспен қамтылып, жұмыс­сыздық деңгейі 3,5 пайызды құраған. Ауылда инфрақұрылымды жаңғырту, кәсіпкерлікті қолдау, ауыл шаруашылығын дамыту, елді мекенді абаттандыру және тұрғындардың өмір сүру сапасын арттыру бағытындағы жұмыстар жүйелі түрде жалғасып жатқанын атап өтті.

Аманкелді ауылдық ардагерлер кеңесінің төрағасы Нұрмағанбет Құдайбергенов ауыл әкімдігімен, білім беру ұйымдарымен, мәдениет меке­мелерімен, учаскелік полиция қызметімен және қоғамдық ұйым­дармен тығыз байланыс орна­тылғанын айтты. Баядамашының кел­­тірген мәліметіне сүйенсек, бар­лық атаулы және мерекелік күн­де тәрбиелік маңызы зор іс-шара өткізіліп келеді. Жастар арасында саламатты өмір салтын қалыптастыру, ауыл тұрғындарының денсаулығын нығайту, елді мекенді абаттандыру мен көгалдандыру жұмысы тұрақты жүр­гізіліп жатқанын жеткізді

Жиын барысында жарыссөзге шық­қан Қамар Рүстемов, Шаһарбек Нұрсейіт баяндамашылардың жұ­мы­сына оң бағаларын беріп, аудан­дық және ауылдық ардагерлер ұйым­дарының атқарып отырған қыз­метіне ризашылықтарын білдірді. Олар қоғамдық келісімді нығайту, ұрпақ тәрбиесіне үлес қосу және ардагер­лердің әлеуметтік мәселелерін шешудегі жұмыстардың алдағы уақыт­та да жалғасын табуына тілектестік білдірді.

Мазмұнды басқосу рухани әсерге де толы болды. Ауылдың ақыны Байрон Есенбаев туған жерге деген сүйіспеншілікті жырлаған «Қоғалыкөл» атты өлеңін оқып, көпшілікке ерекше әсер сыйлады. Өлеңде туған өлкенің табиғаты, ауылдың бірлігі мен елге деген құрмет көркем бейнеленді.

Жиын соңында мәдениет сала­сының майталманы Жантемір Айсин аудан­ның «Алтын қазына» ансамб­лінің Орал қаласына концерттік бағдар­ламамен барып, өнер көрсеткені жөнін­де естелік әңгіме айтты. Ол Батыс Қазақстан жұртшылығының сыр­­бойылық өнерпаздарды ерекше құрметпен қарсы алып, ыстық ықы­ласпен шығарып салғанын атады. Бұл өнер сапары Сыр елінің мәдениетін кеңі­нен насихаттап, өңіраралық рухани байланысты нығайтқан тағылымды іс-шара болғанын жеткізді.

Алқа мәжілісінің қорытындысында аудандық ардагерлер ұйымының бір­қатар белсенді азаматтары мен қоғамдық жұмысқа белсене араласып жүрген ардагерлер құрмет төріне шығарылып, оларға алғыс білдірілді. Көп жылғы еңбегімен елге үлгі болған азаматтарға ізгі тілектер айтылып, ақсақалдардың ақ батасы берілді.

Қоғалыкөл ауылында өткен кезекті Алқа мәжілісі ардагерлер ұйымының қоғамдағы орны мен беделін тағы бір айқындады. Басқосуда көтерілген мәсе­лелер мен айтылған ұсыныстар аудан көлеміндегі ардагерлер қозғалы­сының жұмысын одан әрі жетілдіруге бағытталып, ел бірлігі мен ұрпақ тәр­биесіне қызмет ететін маңызды шешім­дердің қабылдануына негіз болды.

Балтабай ОРДАБЕКОВ