Аудан аумағындағы бірқатар сайлау учаскелерінде ұлттық ойындар ойнатылып, тұрғындардың көңіл-күйін көтеретін мәдени іс-шаралар өткізілуде. Атап айтқанда, алтыбақан құрылып, жастар мен ауыл тұрғындары ұлттық дәстүрге сай ойын-сауыққа қатысуда. Сонымен қатар, қол күрес сияқты ұлттық спорт түрлері де ұйымдастырылып, қатысушылар өзара күш сынасты.

Шара барысында ұлттық тағамдардан дастарқан жайылып, тұрғындарға бауырсақ, шұбат және қымыз ұсынылды. Бұл өз кезегінде келген азаматтарға көтеріңкі көңіл-күй сыйлап, ұлттық дәстүрдің мән-маңызын арттыра түсті.

Сондай-ақ, референдум өтетін учаскелерде арнайы көрмелер ұйымдастырылып, ұлттық қолөнер бұйымдары мен мәдени мұралар көпшілік назарына ұсынылды. Тұрғындар көрмені тамашалап, ұлттық құндылықтармен жақынырақ танысуға мүмкіндік алды.

Жалпы, Сырдария ауданының ауыл тұрғындары референдумға белсенді қатысып, ел болашағына қатысты маңызды саяси науқанға үлкен жауапкершілікпен қарауда. Ұлттық дәстүрлер мен мәдени шаралардың ұйымдастырылуы тұрғындардың бірлігін нығайтып, мерекелік көңіл-күй қалыптастырды.