Балаңыз мектепке дайын ба?

Баланың мектепке дайындығы туралы сөз қозғағанда тек жаңа мектеп формасын алу, мектеп құрал-жабдықтарымен қамтамасыз ету туралы айту жеткіліксіз. Ата-аналарға баласының болашағы мен денсаулығы үшін бұдан басқа білуі тиіс маңызды мәселелер жеткілікті.

Оқушы ұл-қызыңызды сабаққа дайындау барысында ең бірінші денсаулық жағдайына баса мән беру қажет. Бұл өз кезегінде баланың денесі дұрыс қалыптасуына, денсаулығының жақсы болуына ықпал етеді. Әрине денсаулық болмаған жерде білім алу да көп пайда әкелмейді.

«Балаңызды мектепке дайындау барысында тек қажет жабдықты сатып алып қана қоймай, медициналық ұйымдардан толық тексеруден өткізіп алыңыз». Мамандар дәл осылай деп әрбір ата-анаға кеңес береді. Баланы толық тексерістен өткізіп, әсіресе, көру қабілетіне байланысты дәрігермен кеңесу орынды. Сондай-ақ арнайы министрлікпен бекітілген санитариялық қағидаларын бекіту туралы бұйрығы бойынша балалардың дені сау, жан-жақты жетілген азамат болып қалыптасуы үшін мектептерге белгіленген санитарлық талаптар қойылады.

– Мектептердің аумағында олар­дың қызметiмен байланысы жоқ объектілерді орналастыруға жол берілмейді. Мектеп ауласы таза, аяқ және автожолдар тазалауға қолжетімді қатты жабынмен жабылуы тиіс. Барлық үй-жайлардағы еденнің, төбенің, қабырғалардың беті тегіс, саңылаусыз, ақаусыз және механикалық зақымданбаған болуы керек. Барлық мектептегі ағымдағы және күрделі жөндеу жұмыстары сабақ басталғанға дейін аяқталуы тиіс. Оқушылар бар кезде, апатты жағдайларды жоюды қоспағанда, жөндеу жұмыстары жүргізілмейді. Объектілерде ауызсу режимі ұйымдастырылады. Ойын және спорт алаңдарының жабдықтарын қоса алғанда, жиһаз бен жабдық білім алушылар мен тәрбиеленушілердің бойына және жасына сәйкес келуі басты назарда болады. Білім алушылар мен тәрбиеленушілер үшін сатып алынған өнімдердің сапасы мен қауіпсіздігін растайтын құжаттары болуы тиіс. 2025 жылдың 1 қыркүйегінен бастап білім беру ұйымдарында тамақтанудың жаңа стандарты енгізілді. Тамақтану стандартының басты артықшылығы – тұзды, қантты және майды пайдалануды азайту, көкөністер мен жемістерді тұтынуды арттыру. Ас мәзірінен табиғи емес тағамдарды алып тастау керектігі мектеп басшылығына ескер­тілген. Өз ке­зегінде ау­дандық санитариялық-эпи­демиологиялық ба­­қылау басқармасы мамандары білім беру об­ъектілеріндегі ахуалды бақылап, ұдайы назарда ұстайды, – дейді Сырдария аудандық санитариялық-эпидемиологиялық бақылау басқар­масының бас маманы Ұлжан Нұрбаева.

Сондай-ақ мектеп сөмкесінің де белгіленген көлемі мен салмағына сай болуы қажет екенін білесіз бе? Шамадан тыс ауыр салмақ немесе өз денесіне сай келмейтін сөмкені арқалау баланың мойын омыртқасының дұрыс қалыптаспауына әкеп соғады. Балаңызға сөмке таңдағанда арнайы ортопедиялық арқалығы болуын, салмақты және омыртқаға қы­сымды біркелкі бөліп, баланың омыртқасын бұзбай, оның арқасын тік қалыпта ұстау үшін қатты бол­уын, иықбауларының жалпақ болуын ескеру қажет. Оқулық салмағының шекті шамадан асып кетуі ос­теохондроз, сколиоз, жарық секілді ауруларға алып келуі мүмкін. Және мектеп құралдарының, баланың жеке бас гигиенасының сақталуын қамтамасыз ету маңызды. Мысалы, арнайы беторамалдың, су алып жүруге ыңғайлы жеке ыдыстың болуы қажет.

Бұл ретте мәселе білімді әрі дені сау ұрпақ тәрбиелеуге саяды. Денсаулығында кінәрат жоқ оқушының алған білімі сапалы болары анық. Бұл ретте мамандармен қатар үйдегі ата-анаға да үлкен жауапкершілік жүктеледі.

Аружан МҰХАНБЕТҚАЛИ

Фото: Ашық дереккөзден