ҚР Денсаулық сақтау вице-министрі ауданға іс-сапармен келді

Сырдария ауданына арнайы іс-сапармен ҚР Денсаулық сақтау вице-министрі Ардақ Амангелдиев келді. Сапар барысында ҚР Денсаулық сақтау вице-министрі аудандық ауруханаға қарасты «Паллиативтік көмек» және «Медициналық оңалту» бөлімшесінің базасында болып, ақ халатты жандардың жұмысымен танысты.

Жыл басында облыс әкімінің қолдауымен, денсаулық сақтау басқармасының бастамасымен аудандық аурухана жанынан аймақ бойынша науқастарды қабылдайтын «Паллиативтік көмек» және «Медициналық оңалту» бөлімшесі бар жаңа емдеу ғимараты пайдалануға берілгені белгілі. Бұл ретте аудандық аурухананың «Паллиативтік көмек» және «Медициналық оңалту» бөлімшесінің қазіргі жай-күйін баяндаған бас дәрігер Жалғасбек Үсенов ҚР Денсаулық сақтау вице-министрі Ардақ Амангелдиев бастаған аудан қонақтарына кеңінен мағлұмат берді.

– Аудандық аурухананың ескі ғимаратын күрделі жөндеуден өткізіп, облыс халқына қызмет көрсететін емдеу мекемесіне айналдыра алдық. Ғимараттың ішіне күрделі жөндеу жұмысы жасалды. Атап айтқанда, ғимарат бөлмелерінің қабырғаларына әрлеу жүргізіліп, есік-терезе толық жаңартылды. Материалдық базасы жетілдірілген емдеу мекемесі заманауи үлгідегі технологиямен жабдықталды. Ауыр халдегі науқастар мен ұзақ уақыт бойы оңалтуды қажет ететін жандарға тәулік бойы ем-шара жүргізілуде. Оңалту іс-шарасын жасауға барлық мүмкіндік қарастырылған. Мезгілімен науқастар ем қабылдап, дәрігер бақылауында болады. Қос бөлімшеде 5 дәрігер, 50-ге жуық орта буын және кіші буын қызметкерлері бар. Сонымен қатар физио ем жүргізіліп, логопед, психолог, массаж, емдік дене шынықтыру мамандары демалыс күндерге қарамастан жұмыс жасайды. Бөлімшеге қажетті медициналық құрал-жабдықтармен, дәрілік заттармен және арнайы бұйымдармен толық қамтамасыз етілген. «Паллиативтік көмек» бөлімшесінде ашылғаннан бері 387 науқас ем қабылдаған. Бұл науқастар облыс бойынша аудан, қаладан келуде. Ем алып шыққан әрбір науқас дән ризашылығы мен алғысын білдіруде, – деді бас дәрігер.

Жаңғыртудан өткен қос бөлімшенің ғимаратын көрген ҚР Денсаулық сақтау вице-министрі Ардақ Амангелдиев жергілікті халыққа сапалы қызмет үлгісін көрсету керектігін жеткізді. Дәрігерлермен пікір алмасып, денсаулық сақтау саласындағы бірқатар жұмысты саралады. Науқастарға медициналық қызмет көрсету барысын жан-жақты талқылады.

Балтабай ОРДАБЕКОВ