Мектеп – мол қазынасы мөл­діреп жатқан, сол кіршіксіз таза әлемнен өзіне керек асыл мен жауһар секілді баға жетпес «білім» деген байлықты алып, өмі­ріңе нәр беретін алтын ұя! Осы тарихқа толы мекенді артқа тас­тап, болашаққа қадам басқалы тұрған 33 түлек, 33 арман, 33 үміт. Әрқайсысының өмірге деген жеке көзқарасы мен тұлға болып дамуында ұстаздардың орны ерекше. Білім нәрімен сусындатып, бар білгенін үйретуде сынып жетекшілері Мөлдір Болатбекқызы мен Айгерім Ғалымжанқызының еңбегі өлшеусіз. Айтулы күнді өзгеше бір толғаныспен мектеп директоры Света Сақтапова ашып, түлектерге ақ жол тіледі.

– Әр оқушының білімінің кірпішін қалауда мектеп ұстаз­да­ры­ның еңбегі зор. Мектеп – тек білім ордасы ғана емес, әрбір адамның жүрегінде ерекше орын алатын қасиетті мекен. Ал бүгінгі салтанатты кеш ерекше есте қалатын тарихи сәт. Осы уақытқа дейінгі алған білімдеріңді әрі қарай жоғары деңгейде шыңдап, ұстаздарыңның, ата-аналарыңның үмітін ақтаңдар. Келешек өмірге деген қадамдарың әрдайым нық болсын. Алдағы мемлекеттік ҰБТ-дан жоғары нәтижемен қуантып, грант иегері атаныңдар, – деді Света Мұхтарқызы.

Мерекелік салтанатты кеш бітіруші түлектердің өнерімен жалғасты. Әр түлектің жанарынан үміт оты мен қуаныш сезімі байқалады. Толғаныспен шырқаған әндері көрерменнің жүрегін елжіретпей қоймады. Үйлесіммен билеген әр сәті қимастықтың көрінісін бейнелегендей. Әрі қарай іс-шара мектеп бітіргендеріне 10 жыл, 20 жыл болған түлектердің білім ордасына оралу сәтімен жалғасты.

Осыдан он жыл, жиыр­ма жыл бұрын білім нәрімен су­сындап, болашаққа қадам басқан түлектер бүгінде мектебіне са­ғынышпен аңсап жетті. Бітіруші түлектерге жүрекжарды лебіздерін жеткізіп, ұстаздары мен мектеп қабырғасына арнайылап әкелген сый-сыяпаттарын табыстады. Сал­танатты кеш соңында ардагер ұстаздар тілектерін білдіріп, ақ батасын берді.