Шәкірттер қияға самғаған күн
Кеше ауданға қарасты барлық білім ошағында мектеп бітіруші түлектерге аттестат тапсыру салтанаты өтті. Биыл ауданда 441 оқушы мектеп бітірді. Оның ішінде, 28 «Алтын белгі», 48 «Үздік аттестат» иегері бар. Бұл ретте, Қоғалыкөл ауылындағы №44 орта мектептегі ерекше жиынның куәсі болдық.Берекесі тасыған ауылда білім нәрімен сусындап, 35 түлек үлкен өмірге қанат қақты. Жиынға облыстық білім басқармасы басшысының орынбасары Бектұр Қали, қоғам қайраткері, еңбек ардагері Ибрагим Әбибуллаев, республикалық «Тіл сақшысы» газетінің бас редакторы Сәдуақас Аңсатов, облыстық ардагерлер кеңесі төрағасының орынбасары Өмірбек Шәменов, еңбек ардагері Сайлау Әбішов, облыстық мәслихат депутаты Аида Әбибулаева, ауыл әкімі Бақытжан Рахымбеков, аудандық мәслихат депутаты Динара Ибадуллаева қатысты.
Салтанатты жиынды ашқан №44 орта мектеп директоры Ғалымбек Жаппаров жас түлектерді мерейлі сәтпен құттықтады. Сонымен қатар қоғам қайраткері, еңбек ардагері Ибрагим Әбибуллаев өз атынан «Алтын белгі» иегері Дариға Зиябілова, Айым Исламбек, Сая Жамбылға, «Үздік аттестат» иегері Қаракөз Меңілбаева, Ақерке Жағыпароваға «Жаппас» шаруа қожалығы тарапынан арнайы шәкіртақы табыстады.
– Үш жылдан бері дәстүрге айналған үрдіске сай бүгін «Алтын белгі» иегерлеріне арнайы қаржылай сыйлық тағайындап отырмыз. Туған жер топырағынан шыққан әрқайсысымыз білім ошағында ұстаздан тәлім алдық. Бүгінгі жиынға Мұрат ағайымыз келгенде ерекше қуандық. Балалар жүрегі дүрсілдеп, үлкен өмірге жолдама алуда. Білім бәсекесінде топ жарып, ауыл атын асқақта алған оқушыларды мақтан тұтамын. Алдағы уақытта ел мерейін асқақтата берсін, – деді Ибрагим Әбибулаев.
Өз кезегінде Ибрагим Әбибуллаев облыстық білім саласы қызметкерлері кәсіподақ ұйымының «Білім жанашыры» номинациясымен марапатталды. Сонымен қатар мектеп бітіруші түлектердің сынып жетекшілеріне құрмет көрсетілді. Ал мектеп ұжымына облыстық ардагерлер кеңесінің Алғыс хаты берілді.
Балтабай ОРДАБЕКОВ
