Қазақ тілінің тынысы – қоғамның тынысы

Қазақ тілі – жай ғана қарым-қатынас құралы емес. Ол – ұлттың жүрегі, санасы мен болмысы. Тіл – өткен мен болашақты жалғайтын алтын көпір. Қай қоғамда да тілдің жай-күйі – сол елдің ішкі ахуалы мен рухани кеңістігінің айнасы. Сондықтан қазақ тілінің тынысы – бүгінгі қоғамның тынысын білдіреді.

Жақында Мемлекет басшысы Қасым-Жомарт Тоқаев халыққа жолдауында тіл мәселесіне ерекше тоқталды. Ол: «Қазақ тілі – мемлекеттің негізін қалаушы ұлттың тілі. Сондықтан оның қолдану аясын кеңейту – баршамыздың міндетіміз» деп нақты айтты. Бұл – билік тарапынан көптен бері ашық, нық айтылмай келген шындықтың жария айтылған сәті. Енді бұл үндеу қоғамға да серпін беруі тиіс.

Шын мәнінде, қазақ тілінің мәртебесі – тек заңмен емес, күнделікті өмірмен өлшенеді. Жолдауда айтылғандай, ешкімнің тілді меңгеруіне кедергі болмайды. Бірақ қазақ халқы өз тілінде еркін сөйлегені үшін ұялуға немесе түсіндіруге мәжбүр болмауы керек. Бұл – қарапайым құқық. Демек, тіл үшін күрес емес, тіл үшін еркіндік керек.

Қазір қоғамда тіл жайлы көзқарас өзгеріп келеді. Жастардың бір бөлігі қазақ тілінде контент жасап, пікір айтып, еркін сөйлей бастады. Бұл — үлкен үміт. Бірақ әлі де болса, мекемелерде, қоғамдық орындарда, жарнамада, тіпті білім мен ғылымда қазақ тілінің тынысы тар. Тіл – тірі организм. Егер оны кеңістікке шығармай, өз орнына қоймасақ, ол әлсірей береді.  Қазақ тілі – бай, көркем, өрнекті тіл. Бірақ оған сену үшін алдымен өзіміз сенуіміз керек. Тілге деген құрмет – ұран емес, әрекет. Әр отбасы, әр мекеме, әр баспасөз құралы – өз деңгейінде тілге үлес қосса, нәтиже болары анық.

Тіл тағдыры – ел тағдыры. Президенттің үндеуі – бұл бағытта нақты бетбұрыс жасауға берілген мүмкіндік. Енді тек мемлекетке емес, қоғамның өзіне де жауапкершілік жүктеліп отыр.Қазақ тілінің тынысы кеңейген сайын, қоғамның да тынысы ашылады. Бұл – ұлт ретінде өсудің жолы.

Нұрбекқызы Алтынай

Қорқыт ата атындағы Қызылорда университетінің 4 курс студенті

Фото: Ашық дереккөзден