Ұйымшылдық тек Наурыз айынан көрініс таппайды. Құттыбаев көшесінде ұланасыр той болсын, құдайы болсын, ас болсын әр тұрғын білек сыбана кірісіп, қол ұшын созуға даяр. Биыл да «ақ мол болсын» деген ниетпен көше тұрғыны Жанар Серікбаеваның бас көтеруімен, тұрғындардың қос қолдап қолдауымен Наурыз мерекесі Тимур Дүзімбетов пен Гүлшат Өтебасованың шаңырағында аталып өтті. Ақ дастарқан молынан жайылып, мереке тойға ұласты. Қазақы дәстүрді жалғағандай келіндер әдемі қазақы үлгідегі қамзолы және ақ орамалымен көздің жауын алады. Дастарқанға Наурыз айының ұлттық дәстүрлі тағамы наурыз көже таратылып, көптің көзін көрген ақ сақалды қариямыз Ырыстай ата мен ақ жаулықты әжеміз Күләйша апа қазыналы батасын беріп, ықыласын білдірді. Дәмнен ауыз тиіп, кімнің жүйрік екені сыналды. Байырғы дәстүрді жаңғырту мақсатында салт-дәстүрден сұрақ жауап қойылып, ойын қыза түсті. Қариялардың ізін қуып келе жатқан көше үлкендері Әлия апа, Құралай апа және Зәйраш апаларымыз ақжарма тілектерін білдіріп, жастардың ұйымдастырған ойынына тәнті болды. Артынша ұлттық спортымызды дәріптеуде арқан тартыс өтті. Басқаларда ерлер арасында өтсе, бұл көшеде келіндер қауымының арасында өтіп ерекшеленді. Құттыбаев көшесінің бас қосуы жылдағыдан қызықты өтті. Бала-шағаның у-шуының өзі бір бақыт. Қай кезеңде де арқа сүйейтін досың әрі көршің болсын. Дастарқан аққа толы болсын. Жылдан жылға мерекеміз айрықша тойлана берсін.