Достық көшесінің дархан дастарханы
Ырысы мен құты, берекесі мен несібесі қатар келетін Наурыз мерекесін Достық көшесінің тұрғындары сән-салтанатымен атап өтті. Жаңа үй салып, қоныс тойын тойлаған көше тұрғыны Нұржан мен Индираның шаңырағында бас қосқан көшенің үлкен-кішісі бір-бірін мерекемен құттықтады.Мерекелік дастарханды көшенің үлкендері Есенбай Асанов, Ибрагим Сейілов, Әлиасқар Бақторазов, Дастан Сүлейменов бастаған ер-азаматтар бата-тілекпен ашып берді. Мұнан соң жақсы өсиеттер мен қазақы нақыштағы әндер айтылып, ұлттық ойындар ойнатылды. Көшенің ақ жаулықты аналары Жұмакүл Сәдуақасова, Жанат Сүлейменова, Сағира Тұрсынбаева, Күлжәмилә Құлмаховалар тілек айтып, әр шаңыраққа шаттық орнауына, көше тұрғындарының бірлігі бекем, тірлігі көркем болуына тілектестігін білдірді. Бұл күні балалар арқан тартып, асық ойнаса, әйел-аналардың ұйытқы болуымен бесікке салар, тұсаукесер рәсімдері де ұйымдастырылды. Тәй-тәй басқан Бегайым Нұрсұлтанқызының тұсауын болашағы жарқын болсын деген ниетпен Сәрсенкүл Бұхарбаева кессе, Жұлдыз Есжанова Асылым Ибрагимованы бесікке салды. Сондай-ақ «Үздік қазақы киім» аталымымен ерлі-зайыпты Нұржан Әубәкіров пен Айгүл Садықова марапатталды.
– «Достық» атауын иеленген көшеміздің атына заты сай. Бәріміз тату тұрамыз. Бір-біріміздің той-қуанышымызда бірге болып, жақсы қарым-қатынастамыз. Жыл сайын жыл басы – Наурыз мерекесін бірлесе атап өтеміз. Жеті түрлі дәмнен тұратын көже әзірлеп, таратамыз. Биыл да сол үрдіс бойынша мерекелік дастархан әзірледік. Дастарханымыздан жақын орналасқан көшелердің де тұрғындары дәм татты. Наурыз айында айтылған тілектер қабыл болсын. Көшемізде тек той, қуаныш болсын, – дейді көше тұрғыны Гүлжан Жекенова.
Айта кетейік, Достық көшесінде бүгінде 30-ға жуық үй бар. Көшеде еңбек ардагерлері мен көпбалалы аналар көп және жаңадан үй салып жатқандардың қарасы қалың. Бірлігі мен тірлігі үйлескен тұрғындардың көшені асфальттап, табиғи газ жүргізіп, көше жарығын орнатып берген жергілікті атқарушы билікке алғысы шексіз.
А.ҚҰРМАНАЙТЕГІ
