Тәуелсіздік мерекесі қарсаңында облыс әкімі Қырымбек Көшербаев қаладағы халыққа қызмет көрсететін бірқатар мекемелерге арнайы барып, қызметкерлермен жүздесті. Кездесу барысында өз саласы бойынша озық атанған жандарды марапаттады.
Аймақ басшысы алдымен «Қызылорда» автобус паркі» ЖШС-ға барып, қоғамдық көліктердің жай-күйімен танысты. Заманауи нысанда қала көлемінде қызмет көрсететін үлкен сыйымдылықтағы автобустарға арналған тұрақтар, жанармай бекеті, көлік жуу алаңы қарастырылған. Сондай-ақ, жаңа автобустардың техникалық және санитарлық жағдайы елдің сұранысына сай қызмет етеді. 200 автобусқа шақталған парктің жалпы аумағы 5 гектарды құрайды. Сонымен қатар,  250-300 адамды жұмыспен қамтуға мүмкіндік бар.
Жаңа нысанда еңбек етіп жатқан қызметкерлерді еліміздегі басты мереке – Тәуелсіздік күнімен құттықтаған аймақ басшысы оларға табыс тіледі.
– Егемендік бізге оңай келген жоқ. Тәуелсіздігімізді алған санаулы жылдар ішінде еліміз дамудың үлгісін көрсетті. Соның ішінде Сыр өңірі жаңарып, жасарып, ерекше қарқынмен алға басып келеді. Бұл тұрақтылық пен Елбасы саясатының арқасы. Отбасыларыңызға амандық, еңбектеріңізге жеміс тілеймін, – деді.
Өз саласында озық атанған екі қызметкер Инвестициялар және даму министрлігінің «Үздік автокөлікші» төсбелгісімен және  бірқатары облыс әкімінің алғыс хатымен марапатталды.
Аймақ басшысы одан соң «Қызылорда электр тарату тораптары компаниясы» АҚ мен «Қызылорда су жүйесі» мекемесінде болды. Аталған мекемелер қазіргі таңда тұрғындарға сапалы қызмет етіп келеді. Қаланы сумен, жарықпен қамтамасыз етуде күн-түн демей еңбек етіп жатқан сала қызметкерлерінің еңбегі ерекше. Осындай үздіктер облыс әкімінің марапатына ие болды. Сонымен қатар, «Қызылорда электр тарату тораптары компаниясы» ғимаратында ашылған музейдің таныстырылу салтанаты өтті. Онда мекеме жайындағы мәліметтер мен суреттер қойылған.
Қызу жұмысқа қыс жақындағаннан кірісетін «Қызылорда жылу электр орталығының» қызметкерлері де аймақ басшысы қолынан алғыс хат алды. Жергілікті халыққа жылу беріп отырған мекеменің жұмысы оңай емес. Осында кезекші болып қызмет атқаратын Айдана Ибраеваның бұл салада жүргеніне 7 жыл болған. Жас маман тұрғындардан түскен қоңырауға жауап беріп, мәселені хабарлап отырады. Ол өз ісіңді сүйіп атқарсаң, саланың қиындығы болмайтынын айтады.
Облыс әкімі келесі кезекте жаңадан ашылған «Expert» көлікке қызмет көрсету орталығына аялдады. Жаңа сервис орталығында автокөлікті жуу, қосымша бөлшекті жөндеу, бояу және құрал-жабдық дүкені қызмет түрлері қарастырылған. Құны 270 млн теңге болатын автосервисте 20 адам жұмыспен қамтылған. Соңғы технологиялық үлгідегі нысанда автоматтан­дырылған жүйе жұмыс жасайды. Аймақ басшысы кәсіпкердің ісіне сәттілік тіледі.

Мәди ҚҰРМАНӘЛІ.