Осы ретте Қазақстан Республикасы Бас прокура­турасының тапсырмасына сәйкес «Заң және тәртіп» қағидаты аясында аудан көлемінде ауқымды жұмыстар атқарылуда. Сырдария аудандық прокуратурасының ұйымдастыруымен мектеп оқушы­ларын түрлі қауіптен сақтандыру мақсатындағы жұмыстар аясында кездесулер, түсіндірме жұмыстары, түнгі рейд жүргізілуде.

Сондай-ақ құқық қорғау саласының қызметкерлері мектеп оқушыларымен және аудан тұрғындарымен кездесу өткізді.

– Аталған жұмыстардың негізгі мақсаты – еліміздегі кәмелетке толма­­ғандардың арасында құқық­бұзушылық, қылмыстық іс-әрекеттерді болдырмау. Кездесулер барысында құқықбұзушылықтардың, жастар арасында есірткі қылмыстарының алдын алу, тұрмыстық зорлық-зомбылық, ерте жүктілік, алаяқтық, интернет алаяқтық мәселелері туралы ақпарат берілуде. Одан бөлек қатысушыларға арнайы үнпарақ таратылды. Және сала мамандары түнгі уақытта ойын-сауық орталықтары мен дүкендерге рейд жұмыстарын жүргізеді. Осы орайда, ата-аналардан кәмелет жасқа толмаған балаларын түнгі 22.00-ден кейін бақылаусыз қалдырмауын сұраймыз, – дейді Сырдария аудандық прокуратурасының прокуроры Ә.Төлегенова.

Бала қауіпсіздігі мен тәрбиесі – мәңгілік тақырып. Осы ретте аталған құқықтық түсіндірме жұмыстары тұрақты түрде жалғасатынын айта кету орынды.