Тәулік бойы елдің мерейін тасытқан торқалы тойға аудан әкімі Берік Сәрменбаев, саяси ғы­лым­дарының докторы, профессор, журналист, қоғам қайраткері Әбдіжәлел Бәкір, Сәкен Сейфуллин атын­дағы қазақ агротехникалық уни­верситетінің «Технологиялық маши­налар мен жабдықтар» кафе­дра­сының профессоры Әнипа Асқарова, «Арал-Сырдария» бас­сейн­­дік инспекциясының басшысы Қайратбек Сәрсенбаев, «Ыбырай Алтынсарин» атындағы төсбелгісі­нің иегері, білім саласының ардагері Асылхан Дүйсебеков аудандық ардагерлер кеңесінің төрағасы Мұса Келдібаев, ауылдан шыққан тұғырлы тұлғалар, жергілікті тұр­ғындар мен қонақтар қатысты.

Ең алдымен, мерейтойға ортақ­та­сып келген елді мекен қонақ­тары Айдарлыдан 8 шақырым қашық­тықта орналасқан Қожан қожа кесенесіне барып, баба рухына Құран бағыштады. Биыл Қожан қожа кесенесіне баратын жолдың 2,5 шақырымы күрделі жөндеуден өткізілген. Арнайы кіреберіс қақпа орнатылған. Бұдан бөлек, кесене аумағы жаңартылған. Көпшілік атқарылған бірқатар жұмысқа жо­ғары бағасын берді.

Негізінен, Қожан қожаны түркі тектес халықтың басым бөлігі таныған. Ол – Қожа Ахмет Яссауидің ізін қуған. Қасиетті баба Мұхаммед Ханафияның отыз бірінші ұрпағы саналады. Міне, Айдарлының топы­рағынан түлеп ұшқан әрбір адам оның рухына әркез тәу етеді. Мерейтой аясында дін қайраткерінің есімі ұлықталуы – заңдылық.

Аудан әкімі Берік Сәрменбаев қонақ­тармен бірге торқалы тойда «Таза Қазақстан» акциясы аясында ауылдағы саябаққа жеміс ағаш­тарын отырғызды. Тағылымы терең іс-шарадан үлкен де, кіші де қалыс қалмады. Тек қана жақсылықпен аты шыққан ауылдың халқы өскелең ұрпақтың болашағы үшін ізгілікті іске үлес қосты.

Өз кезегінде Ғафурдин Жанұзақов атындағы клубта 50 жылдық мерей­той шеңберінде «Келешегі кемел, тарихы терең – Айдарлым!» тақы­ры­­бын­­да танымдық конференция өткі­зілді. Тағылымды іс-шарада алда­ғы уақыт­та жарық көретін «Айдарлым – алтын бесігім» кітабының таныстырылымы болды.

Конференцияда аудан әкімі Берік Сәрменбаев сөз сөйлеп, ауыл жұрт­шылығын мерейтоймен құттық­тады.

– Баршаңызды құтты қоныс Айдарлы ауылының 50 жылдық мерейтойы­мен шын жүректен құттықтаймын! Халқы­мызда «Елу жылда ел жаңа» деген нақыл сөз бар. Елу жылда ел жаңа­рып, атқарылған істер тағылымы мол тарихқа айналып, бүгінгі күн­нің бағдары анық айқындалады. Сондық­тан құрылғанына 50 жыл болған Айдарлы ауылының айтулы мерейтойын ауданның ортақ қуанышы, ауылдың қалыптасуы мен дамуына үлес қосқан ардақты азаматтардың қажырлы еңбе­гінің жемісі деуге толық негіз бар. Ауыл іргесі өткен ғасырдың басын­да ұжымшар ретінде құрылып, тұрғын­дар атакәсіп – егін егу және диқан­шылықпен айналысқан. 1934-1935 жылдары ұжымшар Айдарлы, Құмшы­ғанақ, Ақарық колхоздарына бірік­тірілді. Соғыс алдында аталған кол­­хоз­дардың экономикалық күш-қуаты арта бастады. Мұнда мақта, арпа, бидай, тары дақылдарымен қатар жүгері, қауын, қарбыз, бақша, үпілмәлік егіліп, Айдарлының атын шығарды. 1950 жылдың екінші жар­ты­сында Айдарлы, Ақарық, Құм­шығанақ, Қызыл Ту колхоздары бірі­гіп, Амангелді колхозы болып аталды. 1958 жылы «1 Май» колхозы­на қосылса, 1961 жылы Айдарлы колхозы қайта бөлінген. 1963-1974 жылдары Амангелді совхозының бөлімшесі болса, 1974 жылы Айдарлы өз алдына совхоз болып құрылды. «Берекелі елге бақ қонады» деп дана халқымыз айтқандай, елде әрдайым ауызбірлік, татулық, ынтымақ болса бақыт та, бай­­лық та, береке де орнайды. Ай­дар­­­лы ауылының тұрғындары бере­келі іске бірігіп, жарты ғасыр бойы ынтымақтың үлгісін көрсетіп келеді. Бүгінгі мерейтой соның дәлелі екені айқын. Ауыл халқын 50 жылдық мерейтоймен құттықтай отырып, Айдарлы ауылының болашағы жарқын, тіршілігі баянды болсын деп тілек білдіремін! Бүгінгі конференция жұмы­сына сәттілік тілеймін, – деді аудан басшысы.

Танымдық конференцияда Айдарлы ауылының тарихы мен ілкімді істері жөнінде бірнеше баяндама оқылды. Ең алғаш совхоз ретінде құрылған жылдары еңселі еңбегімен танылған тұғырлы тұлғалардың есімі жаңғыртылды. Бұл ретте, саяси ғылым­дарының докторы, профессор, журналист, қоғам қайраткері Әбдіжәлел Бәкір, Сәкен Сейфуллин атындағы қазақ агротехникалық универ­ситеті­нің «Технологиялық машиналар мен жабдықтар» кафед­расы­ның профессоры Әнипа Асқарова, «Арал-Сырдария» бас­сейндік инс­пек­ция­сының басшысы Қайратбек Сәрсенбаев сөз сөйлеп, тереңнен зерттелген елді мекен жөнінде тың мағлұматқа тоқталды.

– Балалық шағымыздың куәсі атан­ған туған жер топырағынан талай талант түлеп ұшқаны анық. Қа­шан­­да бірлігі бекем, тірлігі көркем ауы­лы­мыз­дың өсіп-өркендеуіне барымызды саламыз. Бүгін Айдарлы ауы­лында игі жақсылар бас қосуда. Тынымсыз еңбектің, қажыр-қайраттың арқа­сында ауылымыз күннен-күнге жандану үстінде. Танымдық конференция барысында туған жер тарихына тереңнен қанықтық, – деді Әбдіжәлел Бәкір.

«Айдарлым – алтын бесігім» кіта­бы­ның авторы, Айдарлы совхозы­ның директоры, ауыл әкімі болған Қожахмет Мырзаев жинақтың мазмұ­нын таныстырды. Кітап алдағы уақыт­та оқырман қауымға жол тартатын болады.

Айдарлы ауылының 50 жылдық мерей­тойы «Келешегі кемел, тарихы терең – Айдарлым!» тақырыбындағы салтанатты іс-шарамен жал­ға­сын тапты. Орталық алаңда өткен мерекелік кеште Берік Әб­діғаппарұлы ауыл халқын айтулы күнмен құттық­тады.

– Мемлекет басшысы Қасым-Жомарт Кемелұлы Тоқаев Ұлттық Құрылтайда сөйлеген сөзінде «Ауылдар дамыса, ел дамиды» деп атап өтті. Облыс әкімі Нұрлыбек Машбекұлы Нәлібаев ауылдардың дамуына ерекше мән беріп, көп қолдау көрсетуде. Бүгінде Сыр елінде, оның ішінде Сырдария ауданының әлеуметтік-эконо­микалық дамуында үлкен жетіс­тіктер бар. Екі жыл бұрын аудан бюджеті 10 млрд теңгені құраса, бүгінде бюджетіміз 16 млрд теңгеден асты. Бүгінде ынтымағы жарасқан Айдарлы ауылының дамуы қарқынды. Елді мекенде әлеуметтік нысандар жаңарып, жолдар жөнделген. Тұрғындар сапалы ауызсумен толық қамтылған. Көшелер толық жарық­пен қамтамасыз етілген. Соңғы 3 жыл­да елді мекенде аймақ басшысы Нұрлыбек Машбекұлы Нәлібаевтың қолдауы­мен 500 миллион теңгеден аса қаржыға 4 көше жөнделіп, 30 шақырым электр желілері толық жаңар­тылды және тұрғын үйлер пайдалануға берілді. Елді мекенді абаттан­дыру­ға да үлкен мән беріліп келеді. Биыл облыстық «Үлгілі елді мекен» байқауында Айдарлы ауы­лы үздіктер қатарынан көрінді. Ауыл жастарының белсенділігін атап өткен жөн. Елді мекенде жас­тар бригадасы құрылып, бақша дақыл­дарын егіп, нәтижесін көруде. Жас­тар бірігіп, әркез ауылдың дамуына өз үлестерін қосып отырады. Елді мекенге кіреберіс арка, тұрмысы төмен отбасына үй алып беру, қайы­рым­дылық жұмыстарда Айдарлы ауы­лы­ның жастары ұйымшылдық танытуда. Міне, осындай туған жерге деген жанашырлықтың нәтижесінде Айдар­лы ауылы өркендеп, көркейіп келеді. Елді мекеннің дамуына атсалы­сып жүрген азаматтарға шынайы алғы­сым­ды білдіремін! Елді мекеннен еңбек­тің көрігін қыздырған еңбек адам­ы көп шыққан. Мерейтой аясын­да олардың бірқатарын марапаттайтын боламыз. Бүгін осынау бере­келі, киелі өлкенің бейнеткеш халқын мерейтоймен құттықтаймын! Айдарлы ауылы дами берсін! – деді аудан басшысы.

Айтулы күнде ауыл қонақтары мен тұрғындарына «Айдарлы ауылының құрылғанына 50 жыл» мерекелік төс­белгісі, аудан әкімінің Алғыс хаты табысталды. Ауыл әкімі Нұрбол Жұмабеков елді мекенде осыған дейін­гі атқарылған жұмыстарды жинал­ған көпшілікке таныстырды. Іс-шарада аудан өнерпаздары өнер көр­сетіп, жұртшылықтың ыстық ықы­ласына бөленді.

Айдарлылық жастар қай кезде де ерен еріктіліктің үлгісін көрсетіп келеді. Белсенділігі жоғары жастардың демеушілігімен гір тасын көтеру, қол күрес, арқан тарту, волейбол, көкпар ойынынан жарыс өтті. Жарыс­тың ұйымдастырылуына әр жыл­дары дүниеге келген ауыл жастары үлес қосты. Кіл мықтылар арасынан суырылып шыққан жеңімпаздарға бағалы сыйлық үлестірілді.

Көптің делебесін қоздыратын көк­пар ойынында жастардың рухы биік­тей түсті. Бұдан бөлек, ауыл жас­тарының қолдауымен Айбек Әбдрамановқа баспана кілті табыс­талды.

Айдарлы ауылының 50 жылдық мерейтойы кешке эс­трада жұл­дыз­дарының қатысуымен өткен гала-концерт­пен қорытындыланды.