Үш бірдей тәуелсіз кассациялық сот құрылады
2023 жылы 12 қыркүйекте отандық бизнес өкілдерімен кездесуде Қазақстан Республикасының Президенті Қасым-Жомарт Тоқаев «Бүгінде қылмыстық және азаматтық істердің небәрі 5 пайызы ғана кассацияға жолданады. Бұл өте аз, әрі азаматтардың сұранысына сәйкес келмейді. Сондықтан заңгерлер және кәсіпкерлер қоғамдастығымен өз алдына бөлек кассациялық инстанция құру мәселесі жөнінде кеңес өткізу қажеттігі пісіп-жетілді» деген пікірін айтты.Осылайша Жоғарғы Сот заңгерлермен, кәсіпкерлермен, парламент депутаттарымен және азаматтық қоғам белсенділерінің қатысуымен кассациялық алқаның жұмысын жандандыру бойынша кездесулер өткізіп, оған оң баға берілді.
Осыған сәйкес, 2024 жылғы 5 шілдеде «Қазақстан Республикасының кейбір конституциялық заңдарына өзгерістер мен толықтырулар енгізу туралы» Конституциялық заң қабылданды. Кассациялық сот 2025 жылдың 1 шілдесінен бастап Астана қаласында құрылып, республикалық деңгейде жұмыс істейтін болады.
Өз кезегінде тәуелсіз кассациялық сот құру сот төрелігіне қол жеткізуіне мол мүмкіндік беріп, азаматтар мен ұйымдардың сотқа деген сенімін нығайтады. Ең бастысы, бұл әділдік қағидаттарын және құқық үстемдігін толық жүзеге асыруға ықпал етеді деп сенеміз.
Руслан Алдамбергенов,
Сырдария аудандық
сотының төрағасы
Фото: Н.НҰРЖАУБАЙ
