Байқау жеңімпаздары марапатталды

Сырдария аудандық қоғамдық даму бөлімінің қолдауымен «Сырдария – Нұрдария» қоғамдық қорының ұйымдастыруымен сыбайлас жемқорлыққа қарсы қоғамдық мәдениетті қалыптастыру мақсатында мектеп оқушылары арасында эссе байқауы өтіп, қорытындыланды. «Достық үйінде» өткен іс-шараға аудан ардагерлері, үкіметтік емес ұйым жетекшілері, эссе байқауына қатысушы талапкерлер мен олардың ұстаздары қатысты.

Эссе байқауының өткізілетіні алдын ала аудандық газетте және әлеуметтік желілерде жарияланған болатын. «Ел жастары жемқорлыққа қарсы» тақырыбында ұйымдастырылған бай­қау­ға аудан мектептерінен 12 талапкер қатысып, өз туындыларын ұсынды. Оқушылар ережеге сәйкес 300 сөзден аспайтын эссе жазып, «Facebook» әлеуметтік желісінде «Бәріне қол­жетімді» айдарын таңдау арқылы «Сырдария – Нұрдария» қоғамдық қорының парақшасын белгілеп жария­лаған. Комиссия қарауына ұсыныл­ған шығармаларда сыбайлас жемқорлық­қа қарсы қоғамдық мәдениетті қа­лып­­тастыру мен қоғамдық сананы жаңғырту мәселелері қам­тылған.

Марапаттау іс-шара­сында «Сырдария – Нұрдария» қоғамдық қоры­ның төрағасы Марат Омаров жем­қорлықтың ел дамуына кері әсер ететінін тұрғындар санасына сіңіру ортақ міндет екенін айтып, байқаудың сыбайлас жемқорлыққа қарсы тұру, оның зия­нын насихаттау мақсатында өткі­зілгенін жет­кізді. Сондай-ақ бай­қауға қа­тысу­­шы­лардың бел­­сенділігін жоғары бағалап, тәуелсіз сарап­шылардан, қоғамдық ұйым өкілдері мен ау­дан­ға белгілі бас­қа да азаматтардан құралған комиссияның шешімімен жеңімпаздар анық­талғанын айтты. Эсселердің ережеге сәйкес 300 сөзден аспауы қаперге алынды және көшірілмегені арнайы бағдарлама арқылы тексерілді.

Байқау қорытындысында жүлделі І орынмен №35 И.Тоқтыбаев мектеп-лицейдің 9 сынып оқушысы Нұрсезім Өтепберген марапатталса, ІІ орынға №126 орта мектебінің 11 сынып оқушысы Гүлімай Ақназар лайықты деп танылды. Ал ІІІ орын №35 И.Тоқтыбаев мектеп-лицейдің 9 сынып оқушысы Әнел Серікке берілді. Ынталандыру сыйлығымен №42 Қ.Баймағанбетов атындағы мектеп-лицейдің оқушысы Гүлім Қылышбек пен №147 орта мектебінің оқушысы Жансая Толқынқызы марапатталды. Жеңім­паздарға қаржылай және естелік сыйлықтар берілді.

А.ИБРАГИМҰЛЫ